काठमाडौं । नेकपा (एमाले)का अध्यक्ष केपी शर्मा ओलीले सुवास नेम्वाङले संविधान निर्माणका क्रममा खेलेको भूमिका स्मरण गरेका छन् । 

भदौ २६ गते बिहान हृदयघातका कारण निधन भएका नेम्वाङको बिहीबार पशुपति आर्यघाटमा अन्त्येष्टि गरिएको छ ।

नेम्वाङलाई अन्तिम बिदाइ गरेर फर्किएपछि आफूले आठ वर्षअगाडि संविधान निर्माणका क्रममा उनले खेलेको भूमिकालाई स्मरण गरेको ओलीले बताएका छन् । चौतर्फी दबाबका बीचले नेम्वाङले संविधान जारी गर्नमा महत्त्वपूर्ण भूमिका खेलेको ओलीको भनाइ छ ।

ओलीले भारतीय विदेश सचिव नेपाल आएर फर्केपछि नेम्वाङले तत्कालीन प्रधानमन्त्री सुशील कोइरालालाई भेटेर अत्तालिँदै आफूलाई भेट्न आएको स्मरण गरेका छन् । "उहाँले अलि हड्बडाउँदै भन्नुभयो– ‘डरलाग्दो स्थिति छ, ३ गते संविधान जारी गर्नबाट रोकियो भने संविधान मात्रै होइन, सबै बर्बाद हुने छ । यस्तो भयो भने त देश नै सकिन्छ ।’," ओलीले भनेका छन् ।

सामाजिक सञ्जालमा ओलीले लेखेका छन्– प्रिय साथी सुवास नेम्वाङलाई सदाका लागि बिदाइ गरेर आर्यघाटबाट फर्केपछि आज मैले आठ वर्षअघि यसै समयको डायरीको पाना पल्टाएँ । त्यस कठिन बेलाको दृश्य आँखा अगाडि आयो । नेपालमाथि नाकाबन्दीको हल्ला चलिसकेको थियो, सुरक्षाको कारण देखाएर सीमा नाकामा गाडी रोकिन थालिसकेका थिए । भूकम्पको ठूलो क्षतिबाट उठ्न सकेका थिएनौँ । अत्यावश्यक इन्धनको अभावले बजारमा हाहाकार सुरु भइसकेको थियो । विभिन्न जातीय, क्षेत्रीय, धार्मिक समूहलाई उत्तेजित बनाउने र त्यसबाट देशलाई अस्थिरतातर्फ लैजाने प्रयास भित्रभित्रै भइरहेका थिए । नेपाललाई स्वतन्त्र राष्ट्रका रूपमा रहन नदिने एउटा प्रहार खेपिरहेका थियौँ ।  संविधानसभाका सधैँ शान्तरूपमा प्रस्तुत हुने उहाँ त्यो दिन कडारूपमा प्रस्तुत हुनुभएको थियो । दलका नेता, संविधानसभाका अध्यक्ष, प्रधानमन्त्री सबैलाई संविधान रोक्न निकै ठूलो दबाब थियो । भारतीय विदेश सचिव आएर फर्केपछि सुवासजी तत्कालीन प्रधानमन्त्री सुशील कोइरालालाई भेटेर अलि अत्तालिँदै मलाई भेट्न आउनुभयो । उहाँले अलि हडबडाउँदै भन्नुभयो– ‘डरलाग्दो स्थिति छ, ३ गते संविधान जारी गर्नबाट रोकियो भने संविधान मात्रै होइन, सबै बर्बाद हुने छ । यस्तो भयो भने त देश नै सकिन्छ ।’

उहाँ असोज ३ गते संविधान जारी गर्न संसद्‌मा आइदिन निम्तो लिएर राष्ट्रपति रामवरण यादवकहाँ जाँदा राष्ट्रपतिले आउने, नआउने केही भन्नु भएनछ । ‘नआउन पनि सक्ने देखेँ, के गर्ने होला ?’ सुवासजी संविधान जारी नहुने चिन्ताले उत्तेजित हुनुभएको रहेछ । उहाँलाई मैले तपाईं ३ गतेको तयारी गर्नुस्, जे हुन्छ, त्यही दिन गरौँला भनेँ ।

हुन पनि संविधान जारी भएपछि नाकबन्दी भयो । हामीले नाकाबन्दीको त्यो अप्ठेरो पार गरेको झलझली सम्झिरहेको छु, सुवासजी !