काठमाडौं । परराष्ट्रमन्त्री नारायणप्रकाश (एनपी) साउदले प्रधानमन्त्री पुष्पकमल दाहाल ‘प्रचण्ड’को आसन्न अमेरिका र चीन भ्रमण सफल बनाउन राजनीतिक तहमा सहमति भएको बताएका छन् । आफ्नो विदेश भ्रमणबारे सुझाव लिन प्रधानमन्त्री प्रचण्डले आइतबार आयोजना गरेको छलफलपछि सञ्चारकर्मीसँग कुरा गर्दै उनले यस्तो बताएका हुन् ।

संयुक्त राष्ट्रसंघ र चीन भ्रमणका बारेमा गर्नुपर्ने तयारी, राख्नुपर्ने प्रस्ताव, अपनाउनुपर्ने सावधानीलगायत विषयमा प्रधानमन्त्रीले सल्लाह र सुझाव लिएको उनले जानकारी दिए ।

“आज सम्माननीय प्रधानमन्त्रीज्यूको भ्रमणबारे पूर्वप्रधानमन्त्री, राजनीतिक दलका प्रतिनिधि, पूर्वपरराष्ट्रमन्त्रीज्यूहरूलाई बेलाएर आसन्न चीन भ्रमणको बारेमा छलफल भएको छ । युनाइटेड नेसन्स र चीन भ्रमणका सम्बन्धमा पनि भ्रमणका बेला गर्नुपर्ने तयारी, राख्नुपर्ने प्रस्ताव, अपनाउनुपर्ने सावधानी र गर्नुपर्ने कामका बारेमा सुझाव र सल्लाह दिनुभएको छ,” मन्त्री साउदले भने, “सम्बोधनमा प्रधानमन्त्रीज्यूले आमन्त्रित सबैलाई धन्यवाद दिँदै उहाँहरूले दिनुभएको सल्लाह र सुझावलाई महत्त्वपूर्ण रूपमा लिएको र आसन्न भ्रमणलाई सफल बनाउन सबै राजनीतिक तह–तप्कामा सहमति भएको सन्देश दिनुभएको छ ।”