काठमाडौं । चिनियाँ गाडी उत्पादक कम्पनी बियोन्ड योर ड्रिम्स ( बीवाईडी) विश्वकै शीर्ष १० ठूला कार कम्पनीहरूमा सामेल हुन सफल भएको छ ।

बीवाईडी मर्सिडिज बेन्ज समूह र बीएमडब्ल्यूलाई पछि पार्दै शीर्ष १० ठूला कार उत्पादक कम्पनीहरूमा सामेल हुन सफल भएको हो । 

बीवाईडीले सन् २०२३ को पहिलो ६ महिनामा गत वर्षको भन्दा ९६ प्रतिशत धेरै गाडीको बिक्री वृद्धि गरेको छ । कम्पनीले यो अवधिमा १२ लाख ५० हजार गाडीहरू बिक्री गर्दै शीर्ष १०औँ स्थानमा सामेल भएको हो ।

बीवाईडीले गत महिना अर्थात् अगस्ट २०२३ मा दुई लाख ७४ हजार ३८६ गाडी बिक्री गरेको छ । लगातार चौथो महिनामा बीवाईडीले आफ्नै रेकर्ड तोड्दै अगस्टमा सो संख्यामा गाडी बिक्री गरेको हो ।

२०२३ को पहिलो ६ महिनामा बीवाईडीको बिक्री पनि ७२.७२ प्रतिशतले वृद्धि भएको छ । कम्पनीले यो अवधिमा ३५ अर्ब ६६ करोड अमेरिकी डलर बराबरको व्यापार गरेको छ ।