काठमाडौं । प्रतिनिधिसभाअन्तर्गतका तीन संसदीय समितिका बैठक आज बस्दै छ ।

अन्तर्राष्ट्रिय सम्बन्ध र पर्यटन समितिको बैठक बिहान साढे १० बजे बस्ने तय छ । बैठकमा प्रधानमन्त्री पुष्पकमल दाहाल ‘प्रचण्ड’को निकट भविष्यमा हुने विदेश भ्रमणलगायत विषयमा छलफल गरिनेछ ।

आजै बिहान साढे १० बजे शिक्षा, स्वास्थ्य तथा सूचना प्रविधि समितिको बैठक बस्दै छ । बैठकमा समितिमा परेका शिक्षासम्बन्धी उजुरीका विषयमा सम्बन्धित मन्त्रालय, चिकित्सा शिक्षा आयोग, प्राविधिक शिक्षा तथा व्यावसायिक तालिम परिषद् (सीटीईभीटी) र सरोकारवालासँग छलफल गरिनेछ ।

यस्तै, कृषि, सहकारी तथा प्राकृतिक स्रोत समितिको बैठक बस्दै छ । बैठक बिहान ११ बजे सुरु हुनेछ । बैठकमा खाद्य स्वच्छता तथा गुणस्तर विधेयक, २०७७ का विषयमा छलफल गरिने कार्यसूची छ ।

यी सबै बैठक सिंहदरबारस्थित समितिका सभाकक्षमा बस्नेछ ।