काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले विद्युतीय चार्जिङ स्टेसन बनाउनको लागि निजी क्षेत्र आउनुपर्ने बताएका छन् । 

बुधबार नेपाल विद्युत प्राधिकरणले देशभर निर्माण गरेका ५१ वटा चार्जिङ स्टेसनको संयुक्तरूपमा उद्घाटन कार्यक्रममा बोल्दै उनले विद्युतीय सवारी साधनको विस्तार र चार्जिङ स्टेसन विस्तारको लागि निजी क्षेत्रको अग्रसरता आवश्यक रहेको उल्लेख गरे ।

निर्देशक घिसिङले निजी क्षेत्रलाई चार्जिङ स्टेसन विस्तारको लागि ल्याउन ऊर्जा मन्त्रालयले नीतिगत सुधार गर्न लागेको बताए ।  उनले निजी क्षेत्र आएमा प्राधिकरणले दिनुपर्ने सेवा ट्रान्सर्फमरदेखि विद्युत् सप्लाईको साइटमा लगानी गरिरहेको उल्लेख गर्दै जग्गा र चार्जिङ स्टेसन लगानी गरे अरु सुविधाहरूमा प्राधिकरणले लगानी गर्ने प्रतिबद्धता जनाए । 

निर्देशक घिसिङले विद्युत् प्राधिकरणले ५१ वटा स्थानको चार्जिङ स्टेसनको एक साथ उद्घाटनले देशभर विद्युतीय सवारी साधनको प्रवर्द्धनमा सहयोग पुग्ने बताए । पछिल्लो समय माईक्रोबस, ट्याक्सी र व्यक्तिगत सवारी साधनहरू गरी धेरै विद्युतीय सवारी साधनको प्रयोगमा वृद्धि भएको उनको भनाइ छ । 

घिसिङले चार्जिङ स्टेसनले गर्दा नेपालको यातायात क्षेत्रमा सस्तोमा यात्रा गर्न सकिने बताए । चार्जिङ स्टेसनबाट चाँज गर्दा पेट्रोलिय पदार्थ भन्दा करिब १५ देखि २० गुणा सस्तो पर्ने भन्दै डिजेल पेट्रोलमा ६ हजार लाग्ने ठाउँमा ४०० रुपैयाँले पुग्ने अवस्था रहेको बताए ।