काठमाडौं । भारतीय क्रिकेट टिमका अलराउन्डर रविन्द्र जडेजाले एसिया कप–२०२३ मा नेपालले भारतविरुद्ध ब्याटिङमा निकै राम्रो सुरुआत गरेको बताएका छन् ।

सोमबार श्रीलंकाको क्यान्डीमा सम्पन्न खेलमा भारतले नेपालविरुद्ध १० विकेटको जित निकाल्दै सुपर फोरको यात्रा तय गरेको थियो ।  खेलमा टस हारेपछि ब्याटिङमा आएको नेपालले ९.४ ओभरमा विकेट नगुमाई ६५ रन बनाउँदै उत्कृष्ट सुरुआत गरेको थियो । 

नेपालले भारतविरुद्ध ४८.२ सबै विकेट गुमाएर २३० रनको योगफल खडा गरेको थियो ।  तर, दोस्रो इनिङ्सको सुरुआतमै वर्षा भएपछि भारतले डकवर्थ लेविस पद्दति (डीएलएस) अनुसार २३ ओभरमा १४५ रनको लक्ष्य पाएको थियो । 

जसलाई भारतलाई २०.१ ओभरमा विकेट नगुमाई भेट्टायो ।  नेपालको सुरुवाती ब्याटिङमा प्रभावित बनेका जडेजाले पहिलोपटक खेलिरहेकाले नेपाली टिमको बलियो पक्षबारे जानकारी नभएको बताए । 

“नेपालसँग पहिलो पटक खेल्दै थियो । उनीहरुका ब्याटरले कहाँ कुन सट खेल्छन्, उनीहरुको बलियो पक्ष के हो भन्ने थाहा थिएन । पहिलो १० ओभरमा उनीहरुले निकै राम्रो सुरुवात गरे । पहिलो पटक खेलिरहेकाले उनीहरुबारे केही थाहा थिएन । यही भयो, उनीहरुले पहिलो १० ओभरमा राम्रो सुरुआत पाए । तर, स्पिनरमा म र कुलदीप आएपछि हामीले थोरै खेललाई नियन्त्रणमा ल्यायौं,” जडेजाले भने ।

नेपालविरुद्ध तीन विकेट लिएका जडेजाले खेलपछि नेपाली खेलाडीहरुलाई ठूलो खेल भनेर अनावश्यक दबाब नलिन पनि सुझाए ।

“उनीहरुले कुनै ठूलो खेलअघि तपाईंको रुटिन के हुन्छ भनेर सोधिरहेका थिए । मैले उनीहरुलाई म साधारण रुटिन नै राख्छु, गीत सुन्छु, ठूलो टिमसँग खेल्दै छु भनेर अनावश्यक दबाब आफूमा नराख्न भनेँ । आफ्नो सामान्य रुटिनलाई नै फलो गर्न भनेँ,” जडेजाले थपे ।