काठमाडौं । नेकपा (एमाले)को लुम्बिनी प्रदेश अधिवेशनमा उपाध्यक्ष विष्णु पौडेल र महासचिव शंकर पोखरेल गुटको प्रतिस्पर्धाको चर्चाले तरंग पैदा गरेको छ । बुटवलस्थित अन्तर्राष्ट्रिय सम्मेलन केन्द्रमा सुरु भएको अधिवेशनमा पार्टीका सचिवहरूले एमालेलाई एकताबद्ध बनाउनुपर्नेमा जोड दिए ।

लुम्बिनी अध्यक्षमा बहालवाला अध्यक्ष राधकृष्ण कँडेल र केन्द्रीय सदस्य हरि रिजालबीच प्रतिस्पर्धा हुने देखिएको छ । कँडेल पौडेल र रिजाल पोखरेलनिकट मानिन्छन् ।

कार्यक्रममा सचिव पद्मा अर्यालले दुई नेताको भिडन्त भन्ने विषयको ठिक ढंगले जवाफ दिनुपर्ने बताइन् ।

“लुम्बिनी अधिवेशनमा शंकर पोखरेल र विष्णु पौडेलको भिडन्त हुँदै छ रे, आज बाहिर यस्तो खालको हल्ला चलिरहेको छ,” उनले भनिन्, “हामीले त्यो हल्लालाई ठिक ढंगले जवाफ दिनुपर्नेछ । बोल्नेको मुख थुनेर सकिँदैन । साथीहरू, उहाँहरूको लड्ने मैदान अन्तै बनिसक्यो । लुम्बिनीमा लड्नु पर्दैन ।”

उनले एमालेलाई कमजोर बनाउन चाहनेहरूले कुप्रचार गरेर रमाइरहेको आरोप लगाइन् । लुम्बिनीबाट पार्टी एकताको सन्देश दिनुपर्ने उनको भनाइ छ ।

यस्तै, सचिव गोकर्ण विष्टले नेता–कार्यकर्तामा एकता हुन जरुरी रहेको बताए । उनले मिडियामा दुई नेताको नाम जोडेर पार्टीलाई कमजोर नबनाउन आग्रह पनि गरे ।

“हामीले मिडियामा पढ्यौँ, खासगरी दुईजना नेताहरू पार्टीका उपाध्यक्ष र महासचिवलाई नाम जोडेर नेकपा (एमाले)भित्र लुम्बिनीमा अत्यन्त विवाद छ, द्वन्द्व छ, प्रतिस्पर्धा छ भनेर मिडियामा पढ्यौँ । मलाई व्यक्तिगत हिसाबले जानकारी छैन,” उनले भने, “दुवै नेताले त्यो प्रकारले प्रचार गर्नुभएको छ भन्ने लाग्दैन । आज यो नाम, त्यो नाममा जोडेर पार्टीको एकतालाई कमजोर पार्ने कोसिस गर्‍यौँ भने यो देशप्रति, पार्टी, कार्यकर्ताप्रतिको बेइमानी हुनेछ ।”

जनताले संगठनात्मक र भावनात्मक एकता खोजेको उनको भनाइ छ ।