काठमाडौं । उद्योग संगठन मोरङका पूर्वअध्यक्ष सुयश प्याकुरेलले राज्यप्रतिको विश्वास एवं भरोसा गुम्दै गएको बताएका छन् ।
बुधबार बाह्रखरी मिडियाले आयोजना गरेको ‘निजी क्षेत्रको आवाज’ विषयक छलफल कार्यक्रममा कार्यपत्र प्रस्तुत गर्दै उनले राज्यप्रतिको विश्वास एवं भरोसा गुम्दै गएको बताएका हुन् ।
सरकारले पछिल्लो समय भ्रष्टचारमा काण्डमा निजी क्षेत्रका व्यक्तिलाई कारबाही गरेर निर्णय गर्ने व्यक्तिलाई बचाउने जस्ता कारणले राज्यप्रति भरोसा गुम्दै गएको बताए ।
प्याकुरेलले सरकारले निजी क्षेत्रमैत्री कानुन नबनाउँदा समस्या निम्तिएको बताए । व्यवसाय गर्दा अपराधीलाई जस्तो व्यवहार भएको प्याकुरेलले बताए ।
"उद्योगीलाई जेल हाले सरकारले के गर्न खोजेको ? यस्ता नीति नियमले देशमा औद्योगिक क्षेत्र कसरी विकास हुन्छ ?," उनले भने, "हाम्रा कानुन फेर्नु पर्छ । व्यवसायीमैत्री बनाउनु पर्छ । अहिले व्यवसायीलाई जेल हाल्ने काम भएको छ । यो राम्रो हैन । बाहिर सन्देश राम्रो जाँदैन ।"
देशमा काम गर्ने वातावरण नभएको पनि उनले बताए । "काम गर्ने र हामी अफिसमा बसेर काम गर्नु पर्ने मान्छे हो । सरकारलाई ट्याक्स तिर्छौं, तर दबाबमा रहन सक्दैनौं । सिस्टममा काम गर्ने व्यवस्था हुनु पर्छ । दुःख मात्र दिएर हुँदैन," उनले भने ।
