पोखरा । पोखराका व्यवसायीले प्रधानमन्त्री पुष्पकमल दाहाल प्रचण्डको चीन भ्रमणमा पोखरा अन्तर्राष्ट्रिय विमानस्थललाई प्राथमिकता दिनुपर्ने बताएका छन् । सोमबार पोखरा उद्योग वाणिज्य संघमा भएको अन्तरक्रिया कार्यक्रममा उनीहरुले चीनको ऋण सहयोगमा बनेको विमानस्थललाई नै प्राथमिकता दिएर नियमित उडान गराउनुपर्ने तर्फ पहल गर्नुपर्ने बताएका हुन् ।

विमानस्थल सञ्चालनमा आएको आठ महिना बितिसक्दासमेत एउटा पनि नियमित अन्तर्राष्ट्रिय उडान हुन सकेको छैन । चीनबाट नै गत असार ६ गते सिचुवान एयरलाइन्सको विमानले चार्टड उडानमार्फत पोखरा अन्तर्राष्ट्रिय विमानस्थलमा अवतरण गरेको थियो । पोखरामा सोही महिनाको ९ र १० गते भएको ड्रागन बोट रेस फेस्टिभलमा सहभागी हुनेहरुलाई लिएर आएको सिचुवानको उडान नै हालसम्मको एकमात्र अन्तर्राष्ट्रिय उडान हो ।

प्रधानमन्त्री प्रचण्डले यसअघि गरेको भारत भ्रमणमा एयर रुटको विषयमा निष्कर्षमा पुग्ने गरी छलफल नभएको भन्दै पोखराका व्यवसायीहरु निराश थिए । अहिले व्यवसायीले प्रधानमन्त्रीले चीनसँग पोखरा अन्तर्राष्ट्रिय विमानस्थललाई पहिलो एजेण्डामा राख्नुपर्ने बताएका हुन् ।

पोखरा उद्योग वाणिज्य संघको समन्वयमा प्रधानमन्त्रीको भारत भ्रमणमा पोखराका एजेन्डा समावेश गर्नुपर्ने भन्दै सोमबार अन्तरक्रिया आयोजना गरिएको थियो । कार्यक्रमका सहभागी व्यवसायीहरुले विमानस्थल सञ्चालन पहिलो एजेन्डा हुनुपर्ने बताएका थिए ।

प्रधानमन्त्री प्रचण्ड असोज ४ गतेदेखि चीन भ्रमणमा जाँदै छन् । अमेरिकाको न्युयोर्कमा हुने संयुक्त राष्ट्रसंघको महासभामा भाग लिन उनी सेप्टेम्बर १६ मा अमेरिका प्रस्थान गर्दै छन् । न्युयोर्कबाट चीन जाने उनको भ्रमण तालिका छ ।

चीन भ्रमणका बेला पोखरा विमानस्थल सञ्चालनलाई प्राथमिकता दिन आग्रह गरिएको नेपाल उद्योग वाणिज्य महासंघका पूर्वअध्यक्ष आनन्दराज मुल्मीले बताए । उनले भने, “विमानस्थल सञ्चालनको विषय प्रधानमन्त्रीले एजेण्डा बनाउनुपर्छ भन्ने हाम्रो माग हो ।  विमानस्थलको ऋण तिर्न मात्र होइन, हाम्रो पर्यटन बजार जोगाउन पनि पोखरा–चीन सिधा उडान आवश्यक छ ।”

दुई हजार ५०० मिटरको धावनमार्ग बढाएर तीन हजार मिटर बनाउनको लागि पनि चीनकै सहयोग माग्नुपर्ने उनले बताए । चीन भ्रमणका बेला प्रधानमन्त्रीले पोखरा विमानस्थल सञ्चालनको एजेन्डालाई प्राथमिकता दिनुपर्ने उनको माग छ ।

पोखरा क्षेत्रीय अन्तर्राष्ट्रिय विमानस्थल चीन सरकारको २२ अर्ब ऋण सहयोगमा बनेको हो । विमानस्थल बनाउँदा लागेको ऋण तिर्न सरकारले वार्षिक झण्डै एक अर्ब रुपैयाँ किस्ता तिर्नुपर्ने मुल्मीले बताए । ऋण सम्झौताअनुसार २६ किस्तामा ऋण तिरिसक्नु पर्नेछ ।

चिनियाँ पर्यटक र लगानीकर्ता पोखरामा आकर्षित गर्न पनि विमानस्थल सञ्चालन गर्नुपर्ने व्यवसायी गणेशबहादुर भट्टराईले बताए । सरकारले विमानस्थल सञ्चालनमा ल्याउने र नेपालमा २०–२५ लाख पर्यटक ल्याउने उद्घोष गर्दा व्यवसायीले थपेको लगानी अहिले जोखिममा पुगेको उनले बताए ।

पोखरा पर्यटन परिषद्का अध्यक्ष पोमनारायण श्रेष्ठले पोखराबाट अन्तर्राष्ट्रिय उडान गर्न सरकारले नै पहल नगरेकोे बताए । उनले भने, “सरकारले चाह्यो भने नेपाल एयरलाइन्सबाट अन्तर्राष्ट्रिय उडान गर्न सक्छ । सरकारले नै विमानस्थल चलाउन पहल गरेको देखिएन ।”

विमानस्थल सञ्चालनसँगै चिनिया पर्यटकलाई आकर्षण गर्न सरकारले भिसा फ्रि दिनुपर्ने पनि व्यवसायीको माग छ । कोभिडपछि विश्वका विभिन्न देशले पर्यटक तान्न यस्ता ‘अफर’ दिएको भन्दै उनीहरुले नेपाल सरकारले पनि आउँदो सिजनमा पर्यटक आकर्षण गर्ने प्याकेज घोषणा गर्नुपर्ने उनीहरुको माग छ ।

पोखरा उद्योग वाणिज्य संघका अध्यक्ष पवन प्रजापतिले पोखराबाट अन्तर्राष्ट्रिय विमानस्थल चलाउन सरकारलाई दबाब दिनुपर्ने अवस्था आएको बताए । विमानस्थल सञ्चालन गर्न सरकार उदासिन रहेको उनको भनाइ छ ।

विमानस्थल सञ्चालनसँगै नेपाल–चीन जोड्ने मुस्ताङको कोरला नाका सञ्चालन, पोखरामा चिनियाँ लगानी, प्रविधि हस्तान्तरणलगायतका विषय छनोट गरेर प्रधानमन्त्रीलाई ज्ञापनपत्र बुझाउने व्यवसायीको तयारी छ ।