काठमाडौं । प्रधानमन्त्री पुष्पकमल दाहाल ‘प्रचण्ड’ले हाल धरानमा भइरहेका गतिविधि र त्यसले सद्भाव एवं एकतामा पार्न सक्ने नकारात्मक प्रभावप्रति सरकार गम्भीर रहेको बताएका छन् ।

कसैले कसैको धर्म र भावनाप्रति नकरात्मकता, द्वैष बढाउने र एकार्काको धर्ममा खलल पार्ने गरी कुनै काम, व्यवहार गर्न कानुनतः निषेध गरिएको उनले उल्लेख गरेका छन् ।

शनिबार एक अपिल जारी गर्दै उनले सुनसरीको धरानमा विभाजित मनोविज्ञान र क्रियाकलापलाई संवादका माध्यमबाट समाधान गर्न सकिनेतर्फ सरोकारवालाको ध्यानाकर्षण गराएका छन् । त्यसका लागि अग्रसर हुन उनले स्थानीय राजनीतिक दल, सामाजिक संघसंस्था, बौद्धिक समुदायलगायत व्यक्तिमा अपिल गरेका छन् ।

“...केही दिनयता सांस्कृतिक नगरी धरानमा भइरहेका गतिविधि र त्यसले हाम्रो सद्भाव एवं एकतामा पार्न सक्ने नकारात्मक प्रभावबारे नेपाल सरकार गम्भीर छ । हरेक समस्या, विमति र चुनौतीहरूलाई संवाद, सहमति र सहकार्यको बलमा नै समाधान दिन सकिन्छ भन्ने तथ्य हरेक चुनौतीपूर्ण परिस्थितिमा हामीले प्रदर्शित गर्दै आएको एकता र सहकार्यले प्रमाणित गरिसकेको छ,” उनले भनेका छन्, “तसर्थ, धरानमा विद्यमान विभाजित मनोविज्ञान र क्रियाकलापलाई पनि संवादको माध्यमबाट समाधान गर्न सकिनेतर्फ गम्भीर ध्यानाकर्षण गराउँदै त्यस दिशामा आवश्यक पहलका निम्ति स्थानीय राजनीतिक दल, सामाजिक संघसंस्थाहरू, बौद्धिक समुदाय र आदरणीय जनसमुदायमा म हार्दिक अपिल गर्दछु ।”

एकले अर्काको विचार, आस्था र भावनाको सम्मान गरेर मात्र राष्ट्रिय एकता हासिल गर्न सकिनेमा उनले जोड दिएका छन् । “त्यसका लागि संवाद र सहकार्यका माध्यमबाट समस्याको समाधान गर्न र सम्भावित समस्याहरूबाट समाज र नागरिकलाई सुरक्षित राख्न नेपाल सरकारले आवश्यक सतर्कता अपनाइरहेको व्यहोरा समेत म स्पष्ट गर्दछु,” प्रधानमन्त्री प्रचण्डले अपिलमा उल्लेख गरेका छन् ।

विभिन्न वर्ण, लिंग, जातजाति र धर्मको पहिचान भए पनि समग्रमा नेपाली रहेको तथ्य भुल्न नहुने उनले बताएका छन् । नेपालको राष्ट्रिय हित नै सबैका लागि सर्वोपरि रहनुपर्नेमा उनले जोड दिएका छन् ।

“सबै धर्मको ध्येय राष्ट्रको हित, नागरिकको आस्था र विचारको सम्मान एवं समाजको सर्वोपरि हित नै हो । विमतिहरूलाई संवादको माध्यमबाट समाधानमा पुर्‍याउन समेत राजनीतिक शक्तिहरू, विभिन्न सामाजिक संस्थाहरू, धार्मिक समुदाय र त्यसका अगुवाहरू एवं नागरिक समाजको भूमिका नै महत्त्वपूर्ण रहन्छ,” उनले भनेका छन्, “कठिनाइ र चुनौतीको समयमा समस्या समाधानको सूत्रधार बनेर नै हामीले आफ्नो नेतृत्व क्षमता र औचित्यलाई पुष्टि गर्न सक्छौँ ।”

एकता र सद्भावको पक्षमा उभिन र समस्या समाधानका निम्ति पहल लिन प्रधानमन्त्री प्रचण्डले धरानवासीसहित सम्पूर्ण नेपालीमा अपिल गरेका छन् ।

शनिबारै नेपाली कांग्रेसका सभापति शेरबहादुर देउवाले पनि केही दिनयता धरानमा भएको धार्मिक–सामाजिक सद्भाव भड्काउने गतिविधिप्रति चिन्ता व्यक्त गरेका छन् ।

• सद्भाव भड्काउने गतिविधि कसैको हितमा छैन : देउवा