काठमाडौं । स्वास्थ्य तथा जनसंख्या मन्त्रालयले ज्येष्ठ नागरिकको उपचारमा कानुनले तोकेबमोजिमको छुट र सेवा अनिवार्य उपलब्ध गराउन निर्देशन दिएको छ ।
मन्त्रालयले सबै विभाग र केन्द्रीय अस्पतालहरूलाई परिपत्र गर्दै ‘ज्येष्ठ नागरिक ऐन २०६३’ मा तोकिएबमोजिमको छुट र अन्य सेवा दिन भनेको छ ।
सो ऐनको दफा ९ मा स्वास्थ्य सेवा प्रदयाक संस्थाले ज्येष्ठ नागरिकलाई प्राथमिकतामा राखेर सेवा दिनु पर्ने तथा सरकारले तोकेको संस्थाले उनीहरुको उपचारमा ५० प्रतिशत छुट दिनुपर्ने व्यवस्था उल्लेख छ ।
कुन उमेरका नागरिकलाई कति छुट ?
हाल सरकारले ६२ वटा अस्पतालमा ज्येष्ठ नागरिकका लागि जेरियाट्रिक वार्डमार्फत् छुट तथा अन्य सेवा दिँदै आएको छ । ती अस्पतालमा ६० वर्षमाथिका नागरिकले उमेरअनुसारको छुट पाउनेछन् ।
‘ज्येष्ठ नागरिक स्वास्थ्य सेवा सञ्चालन मार्गदर्शन’ अनुसार ६० देखि ६९ वर्षसम्मका ज्येष्ठ नागरिकलाई निश्चित स्वास्थ्य उपचार सेवामा ५० प्रतिशत छुट हुनेछ ।
त्यस्तै, ७० देखि ७९ वर्षसम्मका ज्येष्ठ नागरिकलाई शारीरिक अशक्तता, दीर्घरोग र आर्थिक स्थितिका आधारमा ७५ प्रतिशत छुट पाउने छन् ।
त्यसैगरी सरकारले ७० देखि ७९ वर्षसम्मका नागरिकका लागि सोभन्दा कम उमेरकाहरूको भन्दा थप सुविधाको व्यवस्था गरेको छ ।
८५ वर्षभन्दा माथिकालाई अस्पतालमा उपलब्ध सबै स्वास्थ्य सेवाहरू निःशुल्क हुने व्यवस्था छ । तर, अस्पतालले उपलब्ध गराएको वार्ड वा बेडको प्रयोग नगरी प्राइभेट वार्ड वा क्याबिनमा बसी उपचार गरे सरकारले दिएको यी कुनै पनि सुविधा लागु नहुने मार्गदर्शनमा उल्लेख छ ।
यी हुन् जेरियाट्रिक वार्ड रहेका अस्पतालहरू
