काठमाडौं । नेपाल प्रहरीको केन्द्रीय अनुसन्धान ब्युरो (सीआईबी)ले तत्कालीन भौतिक पूर्वाधारमन्त्री विजयकुमार गच्छदार र राज्यमन्त्री सञ्जय साहसँग बयान लिएको छ ।

ललितानिवास जग्गा प्रकरणमा जोडिएका पूर्वमन्त्री चन्द्रदेव जोशीसित सोमबार बयान लिइएको थियो । त्यसलगत्तै दुई पूर्वमन्त्रीहरू गच्छदार र साहको पनि बयान लिइएको सीआईबीले जनाएको छ ।

जनकपुर बमकाण्डमा दोषी ठहर भई साहले हाल नख्खु कारागारमा जेलजीवन बिताइरहेका छन् । उनलाई सीआईबीले आफ्नै कार्यालयमा झिकाएर बयान लिएको हो ।

सोमबार नै सीआईबीले सरकारी वकिलसमक्ष अनुसन्धान प्रतिवेदन बुझाउने तयारी गरेको थियो । तर, पक्राउ पुर्जी जारी भएका मन्त्रीहरू ‘अन्तिम समय’मा आफैँ बयानका लागि सीआईबी पुगेपछि प्रतिवेदन बुझाउन समेत ढिलाइ भएको जनाएको छ ।

सो प्रकरणमा जोडिएका अझै एक पूर्वमन्त्री डम्बर श्रेष्ठ सीआईबीको सम्पर्कमा आएका छैनन् ।