काठमाडौं । हरिया रंगका आउटर लगाएका एक हुलले खचाखच भरिएको सेतो रंगको गाडी आइतबार अबेरतिर प्रहरीको केन्द्रीय अनुसन्धान ब्यूरो (सीआईबी) को गेट भित्र छिर्‍यो ।

सामान्यतय सीआईबीको कार्यालय भित्र छिर्दा गेटमा प्रहरीकै गाडी भए पनि सोधपुछ गरेरमात्रै प्रवेश दिइन्छ ।  तर, हरिया रंगको आउटर लगाएको गाडी देख्नासाथ भने गेटमा केही नसोधी गाडीलाई प्रवेश दिइयो ।

गाडी सीआईबीको ग्राउण्डको पार्किङमा गएरमात्रै रोकियो । तर, गाडीभित्रका कोही पनि बाहिर झरेनन् ।  बरु सादा पोशाकमा रहेका प्रहरीले दुई–दुई जना गरी सीआईबीको कार्यालयको दोस्रो तलाको छेउको कोठामा पुर्‍याउन थाले त्यो पनि पालैपालो ।

उक्त कोठा सीआईबीले सुन तस्करीबारे अनुसन्धान गर्न बनाइएको छुट्टै टोली राखेको छ । त्यसरी गाडीमा ल्याइएका मध्ये सातजना चिनियाँ नागरिक पनि थिए । चिनियाँ नागरिकको हातमा हतकडी लगाएर गाडी बाहिर झार्दै गर्दा एक प्रहरी अधिकारी भन्दै थिए, “चिनियाँले हैरानीमात्रै गरे । साह्रै अटेरी हुँदा रै’छन् । केही बोल्नै मान्दैनन् ।”

ती अधिकारीले सोही टोलीलाई देखाउँदै थपे– ६० किलो सुन तस्करीका चिनियाँहरुको टोली यही हो । अहिले बयान हुँदैछ । सीआईबीको हिरासत भरिएपछि सुन तस्करी आरोपमा पक्राउ परेकालाई सीआईबीले काठमाडौंका विभिन्न प्रहरीको हिरासतका राखेको छ ।

आइतबार अबेर उनीहरुलाई बयानका लागि सीआईबी पुर्‍याइएको थियो ।  ६० किलो सुन तस्करी प्रकरणमा हालसम्म राजस्व अनुसन्धान विभाग र सीआईबीले गरेर २३ जनालाई पक्राउ गरेको छ । जसमध्ये ७ जना चिनियाँ नागरिक छन् ।

२ साउनमा चिनियाँ नागरिक याओ पेचिङकै समूहले ब्रेक सु मार्फत सुन तस्करी गर्ने गरेको खुलेको छ ।  सीआईबीले चार दिनअघिमात्रै ३२ साउनमा सुन तस्करीका मूख्य आरोपी याओ पेचिङलाई पक्राउ गरेको हो । सीआईबीले ६० किलो सुन तस्करी प्रकरणमा पक्राउ परेकामाथि संगठित तस्करी मुद्दामा अनुसन्धान जारी राखेको छ ।

दोभासेलाई घण्टाको पाँच हजार दिएर बयान

संगठित सुन तस्करी अनुसन्धानमा लागेको सीआईबीले ६० किलो सुन तस्करीको अनुुसन्धानको जरैसम्म पुग्ने जनाएको छ । सुन तस्करी गर्ने गिरोहका मूख्य नाइके चिनियाँ नागरिक याओ पेचिङ पक्राउलेसमेत सीआईबीलाई अनुसन्धानको जरैसम्म पुग्न बल पुगेको सीआईबी स्रोतको दावी छ ।

तर, पक्राउ परेका चिनियाँ आरोपीहरुसँग बयान लिनभने प्रहरीलाई सकस भएको छ । सुन तस्करी अनुसन्धानमा खटिएका प्रहरी अधिकारीसँग चिनियाँ भाषाको अभाव हुँदा बयानमा केही समस्या परेको हो ।
उसो त नेपाल प्रहरीसँग नै चिनियाँ भाषाबारे जानकार जनशक्तिकै अभाव छ । 

प्रहरी स्रोतका अनुसार सुन तस्करी प्रकरणमा पक्राउ परेका चिनियाँसँग बयान लिन सीआईबीले विश्वभाषा क्याम्पसबाट दोभासेको प्रयोग गरेको छ । चिनियाँ नागरिकसँग बयान लिन सीआईबीले मान्यता प्राप्त व्यक्तिलाई प्रयोग गरेको सीआईबीका एसएसपी निदेश आर्चायले पुष्टि गरे । 

तर, अनुसन्धान भइरहेकाले सुन तस्करी प्रकरणरबारे आफू धेरै बोल्न नमिल्ने बताए । प्रहरी उच्च स्रोतका अनुसार भने विश्वभाषाबाट सीआईबीले एक घण्टाको ५ हजार रुपैयाँ तिरेर बयानको लागि चिनियाँ भाषा विज्ञलाई प्रयोग गरेको छ ।

ती अधिकारी भने, “हामीले अनुसन्धानको कुराहरु बाहिर नजाने सर्त राखेर केही भाषा विज्ञहरुलाई राखेका छौं । उनीहरुको डिमाण्डनै पाँच हजार रहेछ ।”