काठमाडौं । वीर अस्पतालले शल्यक्रियाका लागि पालो कुर्नुपर्ने अवस्थाको चाँडै अन्त्य गरिने जनाएको छ । अस्पतालका निर्देशक डा. सन्तोष पौडेलले शल्यक्रियाका लागि महिनौँदेखि पालो कुनुपर्ने स्थितिको अन्त्य गर्न आफूहरू लागिपरेको बताएका हुन् ।

त्यसका लागि अस्पतालको शल्यक्रिया कक्ष पूर्ण क्षमतामा सञ्चालन गर्ने प्रयास गरिरहेको र करारमा जनशक्ति थप्ने योजना रहेको उनको भनाइ छ ।

डा. पौडेलका अनुसार ग्यास्ट्रोसर्जरी र युरोलोजीमा केही जनशक्ति अभावका कारण सो सेवा पूर्ण रूपमा सञ्चालन गर्न सकिएको छैन ।

यस्तै, आकस्मिक सेवातर्फ अहिले पनि एउटै बेडमा दुई/तीन बिरामी राखेर उपचार गर्नुपर्ने बाध्यता रहेको उनले बताए ।

वीरले पछिल्लो समय आकस्मिक सेवामा गम्भीर र सामान्य प्रकृतिका बिरामीलाई छुट्टाछुट्टै राखेर उपचार गर्न थालेको छ । आकस्मिक सेवातर्फ हाल ५२ शय्या सञ्चालनमा छन् ।

“हरेक दिन हरेक सेवाको अपरेसन सेवा सञ्चालन गर्ने गरी हामी अगाडि बढेका छौँ । अहिले नाक, कान, घाँटीको हरेक दिन अपरेसन हुन्छ,” डा. पौडेलले भने, “बर्न युनिट सुरु गर्नका लागि अघिल्लो आर्थिक वर्षमा बजेट थिएन, यो वर्ष बजेट पाएका छौँ । सेवा सञ्चालनमा ल्याउनका लागि अत्यावश्यक औजार, मेसिनहरू र भौतिक पुनःसंरचना गर्नुपर्नेछ, अहिले त्यसका लागि काम गरिरहेका छौँ ।”

वीरले हाल बिहान ८ देखि अपराह्न ४ बजेसम्म ओपीडी सेवा दिइरहेको छ । बन्द रहेका ७० शय्या नर्सिङ जनशक्ति थपिएसँगै सञ्चालनमा ल्याइएको छ ।

आकस्मिक सेवा निःशुल्क सञ्चालनका लागि पर्याप्त बजेट नभएको डा. उनले बताए । सरकारको नीति तथा कार्यक्रममा केन्द्रीय अस्पतालमा आकस्मिक सेवा निःशुल्क दिइने उल्लेख छ । तर, बजेट अभावमा सो नीति कार्यान्वयमा चुनौती रहेको उनी बताउँछन् ।

आकस्मिक सेवा निःशुल्क गराउन सरकारले तीन करोड रुपैयाँ बजेट विनियोजन गरे पनि त्यो पर्याप्त नहुने उनले बताए । आकस्मिक सेवाबापत अघिल्लो वर्ष करिब आठ करोड २० लाख रुपैयाँको छुट उपलब्ध गराइए पनि सरकारले एक करोड १५ लाख मात्र भुक्तानी गरेको डा. पौडेलको भनाइ छ ।