काठमाडौं । ह्याकरहरूले लाखौँ अमेरिकी नागरिकको मेडिकल र स्वास्थ्यसम्बन्धी संवेदनशील विवरण चोरी गरेका छन् ।

आईबीएमले अपरेट गरेको फाइल ट्रान्सफर सिस्टम मुभइटमा रहेको भ्लनेरेबिलिटी अथवा त्रुटिका कारण डेटा चोरी भएको बताइएको छ ।

अमेरिकाको कोलोराडो डिपार्टमेन्ट अफ हेल्थ केयर पोलिसी एण्ड फाइनान्सिङ (एचसीपीएफ)ले शुक्रबार आफू पनि मुभइट मास ह्याकिङको  शिकार भएको पुष्टि गरेको छ ।

ह्याकरहरूले ४० लाखभन्दा बढी बिरामीको स्वास्थ्य विवरण चोरी गरेको बताइएको छ ।

कोलोराडोको एचसीपीएफले डाटा ब्रिचबाट प्रभावित भएकाहरूलाई सूचना जारी गर्दै आईबीएमले डाटा ट्रान्सफर गर्न मुभइट सफ्टवेयर प्रयोग गरेका कारण डाटा चोरिएको बताएको छ ।

पत्रमा एचसीपीएफ र कालोराडो सरकारको कुनै प्रणालीमा प्रभाव नपरेको र आईबीएमले प्रयोग गरेको मुभइटमा रहेका एचसीपीएफका केही फाइलहरूमा ह्याकरले पहुँच पुर्‍याएको उल्लेख गरेको छ ।

चोरी भएको विवरणमा बिरामीहरूको पूरा नाम, जन्म मिति, घरको ठेगाना, सामाजिक सुरक्षा नम्बर, मेडिकेड र मेडिकेयर आईडी, आम्दानीसम्बन्धी जानकारी, क्लिनिकल र मेडिकल डेटा र स्वास्थ्य बिमाको जानकारी रहेको एचसीपीएफले जनाएको छ ।

यसअघि गत जुलाईमा अमेरिकी हेल्थ केयर कम्पनी एचसीएले करिब एक करोड १० लाख जनाको स्वास्थ्य विवरण चोरी भएको बताएको थियो ।