काठमाडौं । साहित्यिक पत्रकार संघले स्थापनाको स्वर्ण महोत्सवका अवसरमा नेपाली साहित्यमा क्रियाशील साहित्यकार, समीक्षक, साहित्यिक पत्रकारहरूलाई सम्मानित गरेको छ ।

सोमबार काठमाडौंमा आयोजित कार्यक्रममा संघले संस्थाका पूर्वअध्यक्षहरू नगेन्द्रराज शर्मा, अच्युतरमण अधिकारी, विश्वविमोहन श्रेष्ठ तथा नरेन्द्रबहादुर श्रेष्ठलाई साहित्यिक पत्रकार सम्मानद्वारा सम्मानित गरेको छ ।

संघले बर्सेनि प्रदान गर्दै आएको ‘व्यथित काव्य पुरस्कार’ २०७४ सालका लागि कवि उदय निरौला, २०७५का लागि कवि श्रवण मुकारुङ, २०७६ सालका लागि बिम्ब कवि रमेश श्रेष्ठ र २०७८ सालका लागि कवि मोमिला जोशीलाई समर्पण गरेको छ ।

त्यस्तै ‘स्वर्ण महोत्सव सम्मान’ साहित्यकारहरू घनश्याम राजकर्णिकार, केके कर्माचार्य, गणेश रसिक, रमा शर्मा, माया ठकुरी, हिरण्यकुमारी पाठक, एसपी कोइराला, डा. सुरेन्द्र केसी, प्रदीप बमजन, डीआर उपाध्यायलाई समर्पण गरेको छ ।

सोहीअवसरमा सर्जकहरू प्रमोद प्रधान, गीता त्रिपाठी, ज्ञानु अधिकारी र छविरमण सिलवाललाई समीक्षकका रूपमा सम्मानित गरियो ।कार्यक्रममा साहित्यिक पत्रकारहरू किशोर पहाडीलगायतलाई प्रशंसापत्र प्रदान गरियो ।

संघका अध्यक्ष राधेश्याम लेकालीले संस्थाले स्वर्ण महोत्सवका अवसरमा गरिएका काम र सम्मानहरूका विषयमा जानकारी गराए ।
सोही कार्यक्रममा प्रमुख अतिथि साहित्यकार यादव खरेल, नगेन्द्रराज शर्मा, मदनदास श्रेष्ठ, रमा शर्मा, रमेश श्रेष्ठ, प्रदीप बमजन, विश्वविमोहन श्रेष्ठ, प्रा.डा. सुरेन्द्र केसी लगायतले बोले ।