काठमाडौं । मनसुनको न्यूनचापीय रेखा सरदर स्थानभन्दा उत्तरतिर सर्दा देशका धेरै स्थानमा अहिले वर्षा भइरहेको छ । यो क्रम केही दिन यथावत रहनेछ । 

सिन्धुली, बर्दिबास तथा आसपासका क्षेत्रमा अहिले भारी वर्षा भइरहेको जल तथा मौसम विज्ञान विभागले जनाएको छ ।

“हामीले शुक्रबार नै अबका केही दिन भारी र धेरै भारी वर्षा हुने जानकारी गराएका थियौं । हाम्रो पूर्वानुमान अनुसार वर्षा र भारी वर्षा पनि सुरु भएको छ,” मौसमविद् गोविन्द झा बाह्रखरीसँग भन्छन्, “अहिले सिन्धुली र बर्दिबास आसपासमा भारी वर्षा भइरहेको छ ।” अन्य क्षेत्रमा पनि अब मनसुनको गतिविधि बढ्ने र भारी वर्षा पनि हुने उनको भनाइ छ । 

“कम्तीमा अझै तीन दिन देशका धेरै स्थानमा वर्षा हुनेछ । योभन्दा अझै केही दिन बढ्न पनि सक्छ,” मौसमविद् झा भन्छन् । 

न्यूनचापीय रेखा सरदर स्थानभन्दा उत्तरतर्फ नेपाल नजिक रहनु नै अहिलेको वर्षाको मुख्य कारण भएको उनले जानकारी दिए । न्यूनचापीय रेखा जहिलेसम्म सरदर स्थानभन्दा उत्तरतर्फ रहन्छ, त्यो समयसम्म नेपालमा ठूलो  परिमाणमा वर्षा हुने उनको भनाइ छ । मौसमविद् झाका अनुसार न्यूनचापीय रेखा सरदर स्थानभन्दा उत्तरतर्फबाट तल झर्न कम्तीमा चार/पाँच दिन लाग्नेछ । 

न्यूनचापीय रेखा सरदरस्थानभन्दा माथि रहनुका साथै अहिले भारतको उत्तरपूर्वी उत्तर–प्रदेश तथा उत्तरपश्चिम बिहार आसपासमा रहेको न्यूनचापीय प्रणालीको पनि प्रभाव रहेको छ । जसका कारण भारी वर्षा भएको हो ।

आज वाग्मती नदीको जलसतह सतर्कता तह आसपास पुग्नसक्ने  पूर्वानुमान रहेको बाढी पूर्वानुमान महाशाखाले जनाएको छ । 

आइतबार र सोमबार नारायणी, कर्णाली, वाग्मती, पूर्वी राप्ती, पश्चिम राप्ती, बबई, महाकाली नदी र यसका सहायक नदीहरूको जलसतह सतर्कता तह आसपास पुग्न सक्ने तथा केहीमा खतरा तह आसपास पुग्ने महाशाखाको भनाइ छ । 

आइतबार र सोमबार कोसी, मधेस, वाग्मती, गण्डकी, लुम्बिनी, कर्णाली र सुदूरपश्चिम प्रदेश भएर बहने स–साना नदीहरूमा आकस्मिक बहावको जोखिम रहेकाले तटीय क्षेत्रमा उच्च सतर्कता अपनाउन महाशाखाले आग्रह गरेको छ । 

आज (शनिबार) राति देशभर सामान्यदेखि पूर्णतया बदली रही देशका धेरै स्थानमा हल्कादेखि मध्यम वर्षा हुनेछ । कोसी, मधेस, वाग्मती, गण्डकी र लुम्बिनी प्रदेशका थोरै स्थानहरूमा मेघगर्जन र चट्याङसहित भारी वर्षा तथा एकदुई स्थानमा धेरै भारी वर्षाको सम्भावना रहेको विभागको भनाइ छ । 

कर्णाली र सुदूरपश्चिम प्रदेशका केही स्थानमा मेघगर्जन र चट्याङसहित भारी वर्षाको सम्भावना रहेको छ ।

आइतबार पनि देशभर पूर्णतया बदली रही धेरै स्थानमा हल्कादेखि मध्यम वर्षाको हुनेछ । कोसी, वाग्मती, गण्डकी, कर्णाली र सुदूरपश्चिम प्रदेशका थोरै स्थानमा साथै मधेस र लुम्बिनी प्रदेशका एकदुई स्थानमा मेघगर्जन र चट्याङसहित भारीदेखि धेरै भारी वर्षाको समेत सम्भावना छ ।

नेपालमा अहिलेसम्मकै धेरै वर्षा कहाँ कहिले ?

विभागका अनुसार सोमबार देशभर सामान्यदेखि पूर्णतया बदली रहनेछ । गण्डकी, लुम्बिनी, कर्णाली र सुदूरपश्चिम प्रदेशका धेरै स्थानमा तथा कोसी, मधेस र वाग्मती प्रदेशका थोरै स्थानमा हल्कादेखि मध्यम वर्षा हुने सम्भावना रहेको छ । 

गण्डकी, लुम्बिनी, कर्णाली र सुदूरपश्चिम प्रदेशका थोरै स्थानमा मेघगर्जन र चट्याङसहित भारीदेखि धेरै भारी वर्षाको सम्भावना रहेको छ । कोसी र वाग्मती  प्रदेशको एकदुई स्थानमा भारी वर्षाको सम्भावना रहेको छ ।

“कम्तीमा तीन दिन भारी वर्षाको सम्भावना रहेकाले बाढी, पहिरोको जोखिम रहेकाले त्यसबाट बच्न सतर्क रहनुपर्ने पनि देखिएको छ,” मौसमविद् झाले भने । 

भारी वर्षाका कारण दैनिक जनजीवन, जनस्वास्थ्य, कृषि, सडक तथा हवाई यातायात प्रभावित हुनसक्ने भन्दै विभागले आवश्यक सतर्क रहन आग्रह गरेको छ ।