काठमाडौं । चितवनको मुग्लिन–नारायणगढ सडकखण्डमा पुनः दुईतर्फी यातायातका साधन सञ्चालनमा ल्याइएको छ । वर्षापछि पहिरोका कारण मंगलबार बिहानैदेखि सडक अवरुद्ध भएको थियो ।

इच्छाकामना गाउँपालिका–६, कालीखोलालगायत स्थानमा पहिरो खसेर अवरुद्ध भएको बाटो दुईतर्फी नै खुलाइएको सडक डिभिजन कार्यालय भरतपुरले जनाएको छ ।

यसअघि, सवारीसाधनको अत्यधिक चापका कारण बिहान करिब पौने १० बजेदेखि केही समय पहिरो पन्छाउन रोकेर अवरुद्ध सडक एकतर्फी खुलाइएको थियो ।

पछि फेरि सवारीसाधनलाई रोकेर पहिरो पन्छाएपश्चात् दिउँसो करिब साढे ३ बजेदेखि दुईतर्फी नै सवारीसाधन सञ्चालनमा ल्याइएको सो कार्यालयले जानकारी दिएको छ ।