काठमाडौं । नेपाली राष्ट्रिय फुटबल टिमले म्यानमारसँग दुई अन्तर्राष्ट्रिय मैत्रीपूर्ण फुटबल खेल्ने भएको छ । नेपाली टिमले फिफा विश्वकप–२०२६ को छनोटको तयारीका लागि म्यानमारसँग दुई मैत्रीपूर्ण खेल खेल्ने तय भएको हो ।

नेपालले सेप्टेम्बर ८ र ११ मा म्यानमारविरुद्ध मैत्रीपूर्ण खेल खेल्ने छ । दुवै खेल म्यानमारको सहर यानगोनमा हुने छन् ।

विश्वकप छनोटको पहिलो चरणमा नेपालले लाओससँग अक्टोबर १२ मा घरेलु मैदानमा र अक्टोबर १७ मा लाओसको मैदानमा खेल्ने छ । नेपालले विश्वकपको दोस्रो चरणमा स्थान बनाए यूएई, बहराइनसँगै श्रीलंका र यमनबीचको विजेतासँग समूह ‘एच’ मा प्रतिस्पर्धा गर्ने छ ।

विश्वकप छनोटका लागि नेपालको प्रारम्भिक टोली घोषणा भइसकेको छ । हाल ३३ सदस्यीय नेपाली टिम छनोटका लागि प्रारम्भिक प्रशिक्षणमा छ ।