काठमाडौं । विश्वका प्रमुख विद्युतीय गाडी (ईभी) निर्माताका रुपमा स्थान बनाउन सफल चिनियाँ कम्पनी बीवाईडीले नेपाली बजारमा आफ्नो स्थान बलियो बनाउँदै लगेको छ ।

नेपाली बजारमा ईभीको प्रयोग तीव्र गति लिँदा प्रमुख ब्रान्डहरुले आफ्नो उपस्थिति बलियो बनाउँदै लगेका छन् । यसबीच बीवाईडीले आफ्ना प्रमुख उत्पादनलाई नेपाली बजारमा भित्र्याएको छ ।

बीवाईडीले फर्च्युन ग्लोबल राजस्वका आधारमा संसारका सबैभन्दा ठूलो ५०० कम्पनीमा २१२औँ स्थान बनाएको छ ।

बीवाईडी नेपालको आधिकारीक वितरक साइमेक्स इंकले बढ्दो मागअनुसार गाडीहरु आयात गरिरहेको बताएको छ । यसबीच बीवाईडीको एसिया प्यासिफिक विभागले नेपालमा ठूलो संख्यामा अट्टो–थ्री (एटीटीओ–३) पठाइरहेको जानकारी दिएको छ ।

• नेपालमा उपलब्ध कुन विद्युतीय गाडीको मूल्य कति ?

सामाजिक सञ्जालमा गाडीहरुको लस्करको फोटो पोस्ट गर्दै बीवाईडी एसिया प्यासिफिकले ‘नेपालको रोमाञ्चक यात्रा’ गर्न तयार भनेर लेखेको छ ।

साइमेक्स इंककी प्रबन्ध निर्देशक यमुना श्रेष्ठले नेपालमा बढ्दो मागअनुसार गाडी भित्र्याइरहेको बताएकी छन् । बीवाईडीका गाडीलाई यसको किफायती मूल्य, रेञ्ज र अन्य आधुनिक सुविधका कारण बढी रुचाइएको उनको भनाइ छ ।

साथै, बीवाईडीकै प्रतिनिधि नेपाल आएर केही फरक किसिमले जाने तयारी भइरहेको समेत उनले बताएकी छन् । तर, नयाँ गाडी लञ्च हुने हो वा विशेष अफरहरु आउने हो भनेर जानकारी खुलाउन भने उनले अहिले तयारी नै भइरहेको बताइन् ।