काठमाडौं । राष्ट्रियसभा बैठकमा प्रमुख प्रतिपक्ष दल नेकपा (एमाले)ले विरोध कायम राखेको छ । एमालेको विरोधपछि राष्ट्रियसभाको बैठक साउन २२ गते दिउँसो १ बजे बस्ने गर स्थगित भएको छ ।

एक सय किलो सुन तस्करी प्रकरणमा उच्चस्तरीय छानबिन समिति गठन नभएसम्म संसद् अघि बढ्न नसक्ने अडानसहित आजको बैठकमा एमालेले अवरोध गरेको हो ।

बैठकमा बोल्दै नेकपा एमाले राष्ट्रियसभाका संसदीय दलका उपनेता भैरवसुन्दर श्रेष्ठले सरकारले सुन तस्करी प्रकरण छानबिनका लागि उच्चस्तरीय छानबिन समिति बनाउनुपर्ने बताए । उनले विमानस्थलबाट त्यति ठूलो मात्रामा भएको सुन तस्करीका कारण अन्तर्राष्ट्रिय स्तरमा नेपालको इज्जतमाथि दाग लागेको बताए ।

यस प्रकरणमा जो व्यक्ति संलग्न भए पनि कानुनको दायरामा ल्याउनुपर्ने उनले बताए । सरकार यस प्रकरणमा गम्भीर हुन नसकेको बरु अहिले नयाँ तथ्यहरु बाहिर आइरहेको उनको भनाइ छ ।

सरकार दोषीलाई कारबाही गर्न उच्चस्तरीय छानबिन समिति बनाउन तयार नभएसम्म संसद् अघि बढ्न नसक्ने उनले स्पष्ट पारे ।