काठमाडौं । डेंगी भाइरसको संक्रमण पाँच हजारभन्दा बढीमा देखिएको छ । तीमध्ये आधा जति सुनसरी जिल्लामा देखिएको इपिडिमियोलोजी तथा सरुवा रोग नियन्त्रण महाशाखाले जनाएको छ ।     

महाशाखाका निर्देशक रुद्रप्रसाद मरासिनीका अनुसार गत पुसयता मात्र पाँच हजार ६८८ जनामा संक्रमण देखिएको छ । सबैभन्दा बढी सुनसरी जिल्लामा तीन हजार चार सय ८६ जनामा डेंगीको संक्रमण देखिएको छ ।

उनले लगातार परिरहेको पानीले गर्दा र सरसफाइमा ध्यान नदिँदा संक्रमण दैनिक बढिरहेको बताए । यही साउन १० गते चार हजार छ सय १९ जनामा देखिएको संक्रमण त्यसपछिको पाँच दिनमा त्यो सङ्ख्या बढेर पाँच हजार ६८८ मा पुगेको छ ।

डेंगी पानी जम्ने सफा ठाउँमा ‘एडिज एजिप्टी र एडिस एल्बोपिक्टस’ प्रजातिको लामखुट्टेले फुल पार्छ र ती फुलबाट लार्भा निस्कन्छ र त्यही लार्भा वयस्क भएर टोकेपछि डेंगी रोग लाग्दछ ।

यसपटक कोसी प्रदेशमा संक्रमण बढेको पाइएको छ । कोसी प्रदेशमा तीन हजार आठ सय २१, वाग्मती प्रदेशमा ९६२, गण्डकी प्रदेशमा ३५७, सुदूरपश्चिम प्रदेशमा ३२५, लुम्बिनी प्रदेशमा १७०, कर्णाली प्रदेशमा २७ र मधेस प्रदेशमा २६ जनामा संक्रमण देखिएको छ ।  

१० जिल्लामा बढी संक्रमण 

नयाँ देखिएका बिरामीमध्ये चार हजार ९३९ (८७ प्रतिशत) बिरामी १० जिल्लाका रहेका छन् ।

 सबैभन्दा बढी सुनसरी जिल्लामा तीन हजार ४८६, धादिङ ६५५, कास्की २०८, दार्चुला १९१, काठमाडौं ९६, सङ्खुवासभा ७५ जना, म्याग्दी ५८, मोरङ ५७, कञ्चनपुर ५७ र झापा ५६ जनामा डेंगीका बिरामी भेटिएका छन् ।

नेपालमा पहिलो पटक सन् २००४ मा एक जनामा डेंगी देखिएको थियो । मन्त्रालयले लामखुट्टेबाट बच्नका लागि सधैँ झुल टाँगेर मात्र सुत्न, खेतबारीमा काम गर्दा लामो बाहुला भएको लुगा लगाउन, घरको झ्याल ढोकामा जाली हाल्न अनुरोध गरेको छ ।

यस्तै सम्भव भएसम्म लामखुट्टे भगाउने धूप वा मलमको प्रयोग गर्न, घरपालुवा पशुपक्षी व्यवस्थित ढंगले पाल्न र घरवरिपरि गमला, टायर वा कुनै पनि खुला भाँडामा पानी जम्न नदिन आग्रह गरेको छ ।

पुसयता डेंगी संक्रमणबाट चार जनाको मृत्यु भएको छ । अहिलेसम्म डेंगी संक्रमण ७० जिल्लामा पुगेको छ । रासस