काठमाडौं । राष्ट्रिय मानव अधिकार आयोगले समयमै न्यायाधीश नियुक्त गर्न आग्रह गरेको छ ।

आयोगले न्यायालयमा लामो समयदेखि दरबन्दीबमोजिम न्यायाधीशको नियुक्ति हुन नसक्दा छिटो छरितो न्याय प्राप्त गर्ने नागरिकको संवैधानिक अधिकारमा असर परेको बताएको छ ।

"सर्वोच्च अदालतमा विगतमा लामो समय प्रधानन्यायाधीश पद रिक्त रहेको तथा पुनः रिक्त हुने अवस्था सिर्जना हुन लागेको एवम् सर्वोच्च अदालत र उच्च अदालतमा समेत रिक्त रहेका न्यायाधीशहरूको नियुक्ति प्रक्रियाका लागि नेपाल सरकारबाट समयमै पहल हुन नसक्दा न्याय निरुपणमा बाधा परेको देखिन्छ," सोमबार आयोगले जारी गरेको विज्ञप्तिमा भनिएको छ ।

आयोगले स्वतन्त्र, निष्पक्ष र सक्षम न्यायपालिका एवम् कानुनी राज्यको अवधारणा संविधानको प्रस्तावनामा नै उल्लेख गरिएको स्मरण गर्दै राज्यका सम्बन्धित निकायले ध्यान दिन नसक्दा अदालतमा न्याय निरुपणका लागि परेका हजारौँ उजुरी थन्किरहेको बताएको छ ।