काठमाडौं । रुसी राष्ट्रपति भ्लादिमिर पुटिनले युक्रेन युद्धलाई लिएर शान्ति वार्ताको विषय अस्वीकार नगर्ने बताएका छन् ।

सेन्ट पिटर्सवर्गमा अफ्रिकी नेताहरूसँगको भेटघाटपछि पुटिनले यस्तो भनेका हुन् । अफ्रिकी र चिनियाँ पहल शान्ति स्थापनाको आधार हुनसक्ने उनको भनाइ छ ।

युक्रेनी सेनाले आक्रमण गरिरहेको बेला युद्धविराम कार्यान्वयन गर्न गाह्रो हुने पुटिनले बताएका छन् । युक्रेन र रुस दुवैले केही पूर्व सर्तबिना वार्ताको टेबलमा नआउने भन्दै आएका छन् ।

युक्रेनले आफ्नो सीमाना सन् १९९१ मा जस्तै पुनर्स्थापित गर्न चाहेको छ भने, क्रेमलिन यसमा सहमत छैन । कीभले आफ्नो देशको नयाँ क्षेत्रीय वास्तविकतालाई स्वीकार गर्नुपर्ने मस्कोको भनाइ छ ।

पुटिनले शनिबार राति पत्रकार सम्मेलनमा बोल्दै युक्रेनमा थप आक्रमणको तत्काल कुनै योजना नभएको समेत बताएका छन् । केही व्यक्तिहरूले रूसलाई भित्रबाट हानि पुर्‍याइरहेको भन्दै उनले केही विरोधीहरूको गिरफ्तारीको बचाउ गरेका छन् ।