काठमाडौं । नेपाली कांग्रेसका नेता डा. शेखर कोइरालाले संसद्‌मा विचाराधीन केही नेपाल संशोधनसम्बन्धी ऐन तत्काल खारेज गर्न माग गरेका छन् । 

नेपाली कांग्रेसको केन्द्रीय समिति बैठकमा डा. कोइरालाले कांग्रेस सहभागी भएको सरकारले दण्डहिनतालाई प्रश्रय दिने कानुन आउनु लज्जास्पद भएको भन्दै तत्काल विधेयक खारेज गर्न माग गरेका हुन् । 

“नेपाली कांग्रेस लोकतान्त्रिक पार्टी हो । तर, दण्डहिनतालाई प्रश्रय दिनेगरी कानुन बनाइँदैछ,” डा. कोइरालाले भने, “संसद्‌मा अपराध संहितासहित केही नेपाल संशोधन गर्नेगरी ल्याइएको विधेयकमा दण्डहिनतालाई प्रश्रय दिने प्रावधानहरू राखिएका छन् । त्यो विधेयक तत्काल खारेज हुनु जरुरी छ ।” 

उनले जनताले नेपाली कांग्रेसबाट दण्डहिनतालाई प्रश्रय दिने कुरा परिकल्पना नगरेको बरु दण्डहिनताविरुद्ध बलियोसँग उभिने अपेक्षा गरेको बताए । 

डा. कोइरालाले नेपाली कांग्रेसहितको सरकारले देशको नेतृत्व गरिरहेका बेला जनजीविकाको सवाल चरम अवस्थामा पुगिरहेको बताए । 

“जनजीविकाको सवालमा जनताले नेपाली कांग्रेस सरकारमा भएको अनुभूति गर्न पाएका छैनन्,” डा. कोइरालाले भने ।