काठमाडौं । रोपाइँको सिजन मानिने असारमा गत वर्षको भन्दा कम रोपाइँ भएको छ । 

चालु वर्षको असार २९ गतेसम्म कुल क्षेत्रफलको ५३ प्रतिशत भूभागमा रोपाइँ भएको छ । गत वर्ष असार २९ गतेसम्म धान रोपाइँ हुने क्षेत्रफलको ६५ प्रतिशत भागमा रोपाइँ भएको थियो ।

देशभर कुल १३ लाख ५७ हजार ८१६ हेक्टरमा रोपाइँ हुन्छ । यो वर्षको असार २९ गते (शुक्रबार)सम्म सात लाख १८ हजार ४७६ हेक्टर जमिनमा रोपाइँ भएको कृषि तथा पशुपक्षी विकास मन्त्रालयको तथ्यांक छ । 

विशेषगरी कोसी, मधेस र वाग्मती प्रदेशमा मनसुन सुरु हुन ढिलो भएका कारण रोपाइँमा कमी देखिएको मन्त्रालयका प्रवक्ता प्रकाशकुमार सन्जेलले जानकारी दिए । 

कर्णाली र सुदूरपश्चिम प्रदेशमा लम्पिस्किन रोगका कारण गोरुको अभावका कारण रोपाइँ थोेरै प्रभावित भएको पनि मन्त्रालयले जानकारी दिएको छ ।

विस्तारै मनसुन सक्रिय भइरहँदा, रासायनिक मलको उपलब्धता सुनिश्चित हुँदा र लम्पिस्किन रोगको प्रभाव कम हुँदै जाँदा धान रोपाइँ हुने प्रतिशत क्रमशः बढ्दै जाने अपेक्षा गरिएको छ । 

धान रोपाइँ कम भए त्यसको प्रत्यक्ष प्रभाव आर्थिक वृद्धिमा पर्ने भएकाले स्थानीय तथा प्रदेश सरकारले ध्यान दिनुपर्ने पूर्वसचिव योगेन्द्रबहादुर कार्की बताउँछन् ।

यो वर्ष कोसी प्रदेशमा ५६ प्रतिशत, मधेसमा २८ प्रतिशत, वाग्मतीमा ४५ प्रतिशत, गण्डकीमा ४७ प्रतिशत, लुम्बिनीमा ६४ प्रतिशत, कर्णालीमा ७० प्रतिशत र सुदूरपश्चिममा ८५ प्रतिशत क्षेत्रफलमा धान रोपाइँ भएको छ ।