काठमाडौं । कुल विदेशी विनिमय सञ्चिति २१.८ प्रतिशतले वृद्धि भएर १४ खर्ब ८० अर्ब ८७ करोड रुपैया पुगेको छ । नेपाल राष्ट्र बैंकका अनुसार २०८० जेठ मसान्तमा विदेशी विनिमय सञ्चिति पौने १५ अर्ब पुगेको हो ।

२०७९ असार मसान्तमा विदेशी विनिमय सञ्चिति १२ खर्ब १५ अर्ब ८० करोड रुपैयाँ बराबर रहेको थियो ।

अमेरिकी डलरमा यस्तो सञ्चिति २०७९ असार मसान्तमा नौ अर्ब ५४ करोड रहेकोमा २०८० जेठ मसान्तमा १८.५ प्रतिशतले वृद्धि भएर ११ अर्ब ३० करोड कायम भएको राष्ट्र बैंकले जनाएको छ ।

कुल विदेशी विनिमय सञ्चितिमध्ये नेपाल राष्ट्र बैंकमा १३ खर्ब २१ अर्ब २५ करोड रहेको छ । राष्ट्र बैंकबाहेकका बैंक तथा वित्तीय संस्थामा विदेशी विनिमय सञ्चिति एक खर्ब ५९ अर्ब ६३ करोड रहेको छ ।

२०८० जेठ मसान्तसम्मको कुल विदेशी विनिमय सञ्चितिमा भारतीय मुद्राको अंश २२.९ प्रतिशत रहेको छ ।

आर्थिक वर्ष २०७९÷८० को ११ महिनाको आयातलाई आधार मान्दा बैकिङ्ग क्षेत्रसँग रहेको विदेशी विनिमय सञ्चिति ११.२ महिनाको वस्तु आयात र ९.६ महिनाको वस्तु तथा सेवा आयात धान्न पर्याप्त रहेको छ ।

२०८० जेठ मसान्तमा विदेशी विनिमय सञ्चितिको कुल गार्हस्थ्य उत्पादन, कुल आयात र विस्तृत मुद्राप्रदायसँगका अनुपातहरु क्रमशः २७.५ प्रतिशत, ८०.३ प्रतिशत र २५.० प्रतिशत रहेका छन् । २०७९ असार मसान्तमा यी अनुपातहरु क्रमशः २४.६ प्रतिशत, ५७.८ प्रतिशत र २२.१ प्रतिशत रहेका थिए ।