काठमाडौं । जर्मन क्लब बायर्न लेभरकुजेनले ग्रानिट साकालाई आर्सनलबाट २५ मिलियन युरोमा अनुबन्धित गरेको छ । स्वीट्जरल्यान्डका ३० वर्षीय मिडफिल्डर साकालाई लेभरकुजेनले पाँच वर्षको लामो सम्झौतासहित भित्र्याएको हो ।

सन् २०१६ मा आर्सनलमा अनुबन्ध भएका साकाले २०१९ मा क्लबको कप्तानी सम्हालेका थिए । आर्सनलसँगको सम्झौत अवधि अझै एक वर्ष बाँकी रहे पनि उनले लेभरकुजेन जाने निर्णय गरेका हुन् ।

आर्सनलका लागि साकाले २९७ खेल खेलेर २३ गोल गरेका छन् । आर्सनलबाट सात वर्ष खेल्दा उनले दुईपटक एफए कपको उपाधि जिते ।

यसअघि, २०२१ मा आर्सनलले रोमाबाट साकाका लागि आएको १५ मिलियन युरोको प्रस्ताव अस्वीकार गरेको थियो । र, सोही वर्ष साकाले आर्सनलसँगको सम्झौता सन् २०२४ सम्मका लागि नवीकरण गरेका थिए ।

गत सिजनको अन्तिम खेलमा आर्सनलले वुल्भ्सविरुद्ध ५–० को जित निकाल्दा साकाले दुई गोल गरेका थिए । खेलको अन्तिम समयमा उनलाई परिवर्तन गरिँदा साकाले रंगशालामा उपस्थित दर्शकबाट ‘स्ट्यान्डिङ ओभेसन’ पाएका थिए ।