काठमाडौं । घरेलु टिम जिम्बाम्बेविरुद्ध ३१ रनको जित निकाल्दै स्कटल्यान्डले भारतमा हुने एकदिवसीय विश्वकपमा छनोट हुने सम्भावनालाई बलियो बनाएको छ ।

मंगलबार जिम्बाब्वेको बुलावाओस्थित क्विन्स स्पोर्ट्स क्लबमा सम्पन्न खेलमा स्कटल्यान्डले प्रस्तुत गरेको २३५ रनको लक्ष्य पछ्याउने क्रममा जिम्बाब्वेले ४१.१ ओभरमा सबै विकेट गुमाएर २०३ रनमात्र बनाउन सक्यो ।

जिम्बाब्वेका र्यान बर्लले ८३ रन बनाए पनि टिमको हार टार्न सकेनन् । वेस्ली मडेभेरेले ४०, सिकन्दर राजाले ३४ रन जोडे । इनोसेन्ट काइया र सिन विलियम्सले समान १२ रन थपे ।

जिम्बाब्वेलाई रोक्न स्कटल्यान्डका क्रिस सोलले तीन विकेट लिए । खेलको ‘म्यान अफ दी म्याच’ समेत चुनिएका सोलले सात ओभरमा ३३ रन खर्चिए । ब्रान्डन म्याकमुलम र मिचेल लिएस्कले समान दुई विकेट लिए । सफ्यान सरिफ, मार्क वाट र क्रिस ग्रेभेसले एक–एक विकेट लिए ।

त्यसअघि टस हारेपछि ब्याटिङमा आएको स्कटल्यान्डले निर्धारित ५० ओभरमा आठ विकेट गुमाएर २३४ रनको योगफल खडा गरेको थियो ।

स्कटल्यान्डका मिचेल लिएस्कले ४८ रन बनाए । म्याथ्यु क्रसले ३८, ब्रान्डन म्याकमुलेनले ३४, जर्ज मुन्सेले ३१, क्रिस्टोफर म्याकब्रिडले २८, मार्क वाटले २१ र थोमस म्याकिन्टोसले १३ रन जोडे ।

जिम्बाब्वेका सिन विलियम्सले तीन विकेट लिएका थिए । टेन्डाइ चताराले दुई र रिचार्ड एन्गाराभाले एक विकेट लिए ।

जितसँगै विश्वकपमा छनोट हुने सम्भावना बलियो बनाएको स्कटल्यान्ड चार खेलबाट ६ अंक जोडेर सुपर सिक्सको दोस्रो स्थानमा उक्लिएको छ । पाँच खेलबाट ६ अंक जोडेको जिम्बाब्वे भने तालिकाको तेस्रो स्थानमा छ । यो हारसँगै जिम्बाब्वेको विश्वकप पुग्ने सम्भावना समाप्त भएको छ ।

छनोटको सुपर सिक्समा जिम्बाब्वे र ओमानसँगै वेस्ट इन्डिज, श्रीलंका, स्कटल्यान्ड र नेदरल्यान्ड छन् । जसमध्ये श्रीलंकाले अन्तिम खेलअगावै विश्वकपमा स्थान बनाइसकेको छ । सुपर सिक्सबाट शीर्ष दुई टिमले यसै वर्ष भारतमा हुने एकदिवसीय विश्वकपमा स्थान बनाउनेछन् ।