काठमाडौं । कतार एयरवेजको शनिबार एउटा उडान रद्द गरिएको छ । बेलुका ६ बजे काठमाडौंबाट दोहातर्फ जानुपर्ने विमानको उडान रद्द गरिएको त्रिभुवन अन्तर्राष्ट्रिय विमानस्थलका प्रवक्ता टेकनाथ सिटौलाले जानकारी दिए ।

उनका अनुसार सो विमानमार्फत २६० यात्री दोहा जाने तय थियो । प्राविधिक समस्याका कारण उडान रद्द गरिएको उनले बताए ।

“टेक्निकल समस्या भएर रद्द भएको हो,” उनले बाह्रखरीसित भने । कतार एयरवेजको ६४७ उडान नम्बरको विमानको उडान रद्द गरिएको हो ।

२६० मध्ये १०५ यात्रीलाई आज बिहान अर्को विमानमार्फत दोहा पठाइएको उनले जानकारी दिए । सोही विमान तालिकाका बाँकी अरू यात्रीलाई आजै दिउँसो र बेलुकासम्म दोहा पठाइने तयारी रहेको उनले बताए ।

“२६० जनामध्ये १०५ जना आज बिहान अर्को फ्लाइटमा मिलाएर लगिसक्यो,” प्रवक्ता सिटौलाले भने, “१५५ जना बाँकीलाई आज दिउँसो र बेलुकीसम्म ६ बजेसम्म पठाउने सूचना प्राप्त छ ।”

उक्त विमान चालु अवस्थामा भए त्यसैबाट र नभए नियमित उडानमार्फत रोकिएका यात्रीलाई दोहा पठाइने तयारी रहेको उनले जानकारी दिए ।

उक्त विमानको मर्मतकार्य जारी रहेको उनले बताए ।