काठमाडौं । नेपाली राष्ट्रिय फुटबल टिम फिफा वरीयतामा एक स्थान खस्किएको छ ।

फिफाले बिहीबार अद्यावधिक गरेको नयाँ वरीयताअनुसार नेपाल एक स्थान तल झर्दै १७५औँ स्थानमा छ । यसअघि नेपाल वरीयताको १७४औँ स्थानमा थियो ।

भारतमा जारी साफ च्याम्पियनसिपमा दुई खेलमा हार बेहोरेका कारण नेपालको वरीयता खस्किएको हो । नेपालले च्याम्पियनसिपको समूह चरणका खेलमा कुवेत र घरेलु टिम भारतसँग हार बेहोरेको थियो ।

नेपालले कुवेतसँग ३–१ र भारतसँग २–० को हार बेहोरेको थियो । च्याम्पियनसिपको समूह ‘ए’ मा रहेको नेपालले अन्तिम खेलमा भने पाकिस्तानविरुद्ध १–० को जित निकालेको थियो । तर, दुई खेलमा हार बेहोरेका कारण नेपाल च्याम्पियनसिपको समूह चरणबाटै बाहिरिसकेको छ ।

दक्षिण एसियामा वरीयताको शीर्ष स्थानमा भारत यथावत् छ । भारत वरीयताको १००औँ स्थानमा छ । यस्तै, दक्षिण एसियाको दोस्रो स्थानमा रहेको माल्दिभ्स १५४औँ स्थानमा छ ।

तेस्रो स्थानमा नेपाल रहँदा चौथो स्थानको भुटान १८४औँ, पाँचौ स्थानको बंगलादेश १९२औँ, छैटौँ स्थानको पाकिस्तान २०१औँ र पुछारको श्रीलंका २०७औँ स्थानमा छ । श्रीलंका हाल फिफाको प्रतिबन्धमा छ ।

विश्व वरीयताको शीर्ष स्थानमा भने अर्जेन्टिना यथावत् छ । दोस्रो स्थानमा फ्रान्स, तेस्रो स्थानमा ब्राजिल, चौथोमा इंग्ल्यान्ड र पाँचौँ स्थानमा बेल्जियम छन् ।