काठमाडौं । पाकिस्तानको विदेश मन्त्रालयले भारतमा हुने एकदिवसीय विश्वकपमा सहभागिताका लागि ‘सबै पक्षको मूल्यांकन’ गरिरहेको बताएको छ ।

राजनीतिक तिक्तताका कारण यी दुई देशबीचको खेल सम्बन्ध पनि सहज छैन । त्यसै कारण पछिल्लो एक दशकयता भारत र पाकिस्तानले एसीसी र आईसीसीका प्रतियोगिताबाहेक अन्य दुई देशीय शृंखला खेलेका छैनन् ।

पाकिस्तानबाट गत महिना विदेशमन्त्री बिलावाल भुट्टो–जर्दारीले गोवामा भएको सांघाई कर्पोरेसन अर्गनाइजेसनको बैठकका लागि भारत भ्रमण गरेका थिए । भुट्टोको यो भ्रमण पाकिस्तानका शीर्ष अधिकारीले पछिल्लो नौ वर्षमा गरेको पहिलो थियो । 

विदेश मन्त्रालयका प्रवक्ता मुमताज जाहरा बलोचले पाकिस्तानले “राजनीतिलाई खेलकुदसँग मिसाउनु हुँदैन” भन्ने धारणा राखेको बताइन् ।

“पाकिस्तानमा क्रिकेट नखेल्ने भारतको रणनीति निराशजनक छ,” बलोचले भनिन्, “हामी पाकिस्तानी क्रिकेटरहरूको सुरक्षा अवस्थालगायत विश्वकपमा हाम्रो सहभागितासम्बन्धी सबै पक्षहरूलाई अवलोकन र मूल्यांकन गरिरहेका छौँ । र, हामी समयमै पाकिस्तान क्रिकेट बोर्डलाई हाम्रो विचार प्रस्तुत गर्नेछौँ ।”

पाकिस्तानको सहभागितामा आशंकाका कारण विश्वकप सुरु हुन तीन महिना मात्रै बाँकी रहँदा पनि यसको मिति र स्थान निश्चित हुन सकेको छैन ।

भारतले अगस्ट ३१ बाट सुरु हुने एसिया कपका लागि पाकिस्तानको यात्रालाई अस्वीकार गरिसकेको छ । जवाफमा पाकिस्तानले एसिया कपको आयोजक अधिकार गुमाएमा भारतमा हुने विश्वकप बहिष्कार गर्ने धम्की दिएको छ ।

यी दुईको तनावमा सहमति खोज्दै एसियाली क्रिकेट काउन्सिलले क्षेत्रीय प्रतियोगिता ‘हाइब्रिड मोडल’ मा चार खेल पाकिस्तानमा र बाँकी ९ खेल श्रीलंकामा आयोजना गरिने बताएको छ ।