काठमाडौं । आईसीसी क्रिकेट विश्वकप छनोटमा वेस्ट इन्डिजले जिम्बाब्वेसँग ३५ रनको हार व्यहोरेको छ ।

शनिबार जिम्बाब्वेको राजधानी हरारेस्थित हरारे स्पोर्ट्स क्लबमा घरेलु टिमले २६९ रनको लक्ष्य प्रस्तुत गरेको थियो । जवाफमा दुईपटकको विश्वकप विजेता वेस्ट इन्डिजले ४४.४ ओभरमा सबै विकेट गुमाएर २३३ रन मात्र बनाउन सक्यो ।

वेस्ट इन्डिजका काइल मायर्सले ५६ रन जोडे । रोस्टन चेजले ४४, निकोलस पुरनले ३४ र कप्तान साई होपले ३० रन बनाए । ब्रान्डन किङ र जासन होल्डरले १९ रनको योगदान गरे ।

जिम्बाब्वेका टेन्डाई चताराले तीन विकेट लिए । ब्लेसिङ मुजराबानी, रिचार्ड एन्गाराभा र सिकन्दर राजाले समान दुई विकेट लिए । बेलिंटन मसाकाड्जाले एक विकेट झारे ।

त्यसअघि, टस हारेर ब्याटिङमा थालेको जिम्बाब्वेले ४९.५ ओभरमा सबै विकेट गुमाएर २६८ रन बनाएको थियो ।

जिम्बाब्वेका सिकन्दर राजाले ६८ रनको योगदान गरे । र्यान बर्लले ५० रन थपे । कप्तान काइग एर्भिनले ४७, जोएलर्ड गम्बीले २६, सिन विलियम्सले २३ र ब्लेसिङ मुजराबानीले ११ रन जोडे ।

वेस्ट इन्डिजका किमो पाउलले तीन विकेट लिए । अल्जारी जोसेफ र अकेइल हुसैनले समान दुई विकेट लिए । काइल मायर्स र रोस्टन चेजले समान एक विकेट झारे ।

जितसँगै तीन खेलबाट ६ अंक जोडेको जिम्बाब्वे समूह ‘ए’को शीर्ष स्थानमा उक्लिएको छ । समान खेलबाट चार अंकको वेस्ट इन्डिज तेस्रो स्थानमा छ । यो समूहबाट जिम्बाब्वे, नेदरल्यान्ड्स र वेस्ट इन्डिज सुपर सिक्समा प्रवेश गरिसकेका छन् । समूहको पुछारका दुई टिम नेपाल र अमेरिका समूह चरणबाटै बाहिरिएका छन् ।

• नेदरल्यान्ड्ससँग हार : विश्वकप छनोटको समूह चरणबाटै बाहिरियो नेपाल

छनोट प्रतियोगितामा सहभागी १० टिमलाई दुई समूहमा विभाजन गरिएको छ । समूह ‘ए’मा नेपालसँगै जिम्बाब्वे, नेदरल्यान्ड्स, वेस्ट इन्डिज र अमेरिका छन् । समूह ‘बी’मा युनाइटेड अरब इमिरेट्स (यूएई), श्रीलंका, स्कटल्यान्ड, आयरल्यान्ड र ओमान छन् ।

प्रत्येक समूहबाट शीर्ष तीन टिम सुपर सिक्समा प्रवेश गर्नेछन् । सुपर सिक्सबाट शीर्ष दुई टिम यसै वर्ष भारतमा हने एकदिवसीय विश्वकपका लागि छनोट हुनेछन् ।