काठमाडौं । नेपाली कथानक चलचित्र ‘परस्त्री’ले सेन्सर बोर्ड (केन्द्रीय चलचित्र जाँच समिति)बाट रिलिजका लागि अनुमति पाएको छ । सेन्सर बोर्डले आज पीजी सर्टिफिकेट दिएपछि ‘परस्त्री’ले रिलिजका लागि अनुमति पाएको हो । 

चलचित्रमा रहेका केही सिन हटाए र केही सिन ब्लोर गरेपछि बोर्डले पीजी सर्टिफिकेट दिएको हो । अब यो सिनेमा हेर्न १६ वर्षमुनिका बालबालिकाले अभिभावक लिएर मात्रै हल जानु पर्नेछ ।  

यसअघि सेन्सर बोर्डले चलचित्रमा रहेका केही सिन नहटाउँदासम्म रिलिजका लागि अनुमति दिन अस्वीकार गरेको थियो । 

सुरज पाण्डेको डेब्यु निर्देशन ‘परस्त्री’मा शिल्पा मास्के कोसिस क्षेत्री, गौरव विष्ट मुख्य भूमिकामा छन् । दीपेन्द्र के खनालले लेखेको चलचित्रकी निर्मात्री शर्मिला पाण्डे हुन् ।  

असार १५ गते नेपाल र भारतमा चलचित्र एक साथ रिलिज हुँदै छ । हिन्दी र नेपाली भाषामा बनेको चलचित्र भारतमा पनि रिलिज हुने निर्माण पक्षले जनाएको छ ।

रिलिजको अनुमति नपाएको ‘परस्त्री’ निर्माण पक्षले अब के गर्छ ?

यसैबीच, ‘परस्त्री’को लिरिकल भिडियो गीत पनि आज सार्वजनिक गरिएको छ । सिनेमाकी मुख्य पात्र आभ्याको जन्मदिनको सेटअपका तयार पारिएको सार्वजनिक गीतले सिनेमाको कथाको बारेमा प्रस्ट्याउने निर्माण पक्षले जनाएको छ ।

‘जीवन भनेको’ बोलको गीतमा सिनेमाका मुख्य कलाकार कोसिस क्षेत्री, शिल्पा मास्के र गौरव बिष्टका चल अचल दृश्यहरु समावेश गरिएको छ । केके ब्रदर्सको कम्पोज तथा शब्द रचना रहेको गीतको संगीत संयोजन उदयराज पौडेलको छ ।