काठमाडौं । नेकपा (माओवादी केन्द्र) र पूर्वप्रधानमन्त्री डा. बाबुराम भट्टराई नेतृत्वको नेपाल समाजवादी पार्टी (नेसपा)बीच एकता हुने चर्चा केही समयदेखि चल्दै आएको छ । चार दल मिलेर गठन गरिएको समाजवादी मोर्चामा माओवादी अध्यक्षसमेत रहेका प्रधानमन्त्री पुष्पकमल दाहाल ‘प्रचण्ड’ले नेसपा सामेल नगराएपछि एकता प्रक्रिया अघि नबढ्ने आशंका पनि राजनीतिक वृत्तमा भइरहेको छ ।
 
नेसपाका सह–अध्यक्ष एंव वाग्मती प्रदेशका आन्तरिक मामिला तथा कानुनमन्त्री गंगानारायण श्रेष्ठ पार्टी एकताका लागि मोर्चा निर्माणले अवरोध नगर्ने बताउँछन् । मोर्चा निर्माण र पार्टी एकताको विषय फरक भएको उनको भनाइ छ । समाजवादी मोर्चा सरकार टिकाउन गणीतिय खेलका लागि भए जनताका लागि सुखद् रहेने उनको टिप्पणी छ । 

बिहीबार काठमाडौंमा सञ्चारकर्मीसँगको भेटघाटमा उनले आफूहरु एकताबारे थप निर्णय गर्न माओवादीको जवाफको प्रतिक्षामा रहेको बताए । माओवादीले असार महिनाभित्र एकताबारे पार्टी बैठकको निष्कर्ष सुनाउने जवाफ दिएको उनले जानकारी दिए ।
 
“दुई पार्टीको एकताका लागि वार्ता समिति बनाएर पटकपटक वार्ता गर्यौं । हामीले एकताका निम्ति आधार प्रस्ताव प्रस्तुत गरेका छौं । हामीले पठाएको आधार प्रस्तावको औपचारिक जवाफको प्रतिक्षामा छौं,” श्रेष्ठले भने, “यो महिनाभित्र पार्टी केन्द्रीय कमिटीको बैठक बसेर तपाईंहरुलाई औपचारिक जवाफ दिन्छौं भन्नुभएको छ, त्यसको पर्खाइमा छौं । जवाफ आइसकेपछि ठोस निर्णय गरेर अघि बढ्छौं ।”

नेसपाले माओवादीलाई पार्टीको नाम, विचार, सिद्धान्त, नेतृत्व, संगठनलगायत विषयमा ८ पृष्ठ लामो आधार प्रस्ताव पठाएको छ । माओवादीले त्यसको जवाफ केन्द्रीय कमिटीबाट दिने भनिए पनि बैठकको टुंगो लागेको छैन ।