काठमाडौं । नेकपा (एमाले)का सांसद गोकर्ण विष्टले सरकारले विद्युत्को आन्तरिक खपत बढाउन नसकेको बताएका छन् । सोमबार प्रतिनिधिसभा बैठकमा उनले यस्तो बताएका हुन् ।

अहिले पनि देशमा आन्तरिक खपतको अवस्था कहालीलाग्दो रहेको उनले उल्लेख गरे । प्रधानमन्त्री पुष्पकमल दाहाल ‘प्रचण्ड’को भारत भ्रमणका क्रममा १० हजार मेगावाट बिजुली भारतले खरिद गर्ने विषय चर्चामा आएको उनले बताए । तर, जुनसुकै देशको ठेकेदार र कम्पनीबाट उत्पादित बिजुली निर्वाध ढंगले पठाउने सन्दर्भमा कुनै सहमति भएको छ ? भन्दै सांसद विष्टले प्रश्न गरे ।

१० हजार मेगावाट बिजुली निर्यात गर्नका लागि आवश्यक पर्ने संरचना निर्माणका विषयमा सरकार गम्भीर नबनेको उनको आरोप छ ।

“विद्युत्को आन्तरिक खपत बढाउनुपर्ने हो, तर आज पनि देशमा आन्तरिक खपतको अवस्था कहालीलाग्दो छ । आज पनि, ११३ वर्ष लामो विद्युत् उत्पादनको इतिहास बोकेको हाम्रो देशमा अहिले पनि सबै जनताले विद्युत् प्राप्त गरेका छैनन् । अहिले पनि हजारौँ, लाखौँ घरहरू अँध्यारोमा बसिरहेका छन् । विद्युतीय सवारीसाधन, इन्डक्सन चुलोलाई अहिले पनि ठिक ढंगले प्रयोग गर्न सकिएको छैन । २०२१ को तथ्यांकानुसार ६० प्रतिशत फ्युलमा आधारित परम्परागत र २७ प्रतिशत, डिजेल, पेट्रोल, एलपीजी र कोलको प्रयोग भइरहेको छ र विद्युत्को प्रयोग ४.२ प्रतिशत मात्रै छ । ऊर्जा खपतको हिसाबले यो प्रकारको अवस्था छ । विद्युत् खेर जाने भयो भनेर विद्युत् उत्पादन बन्द गरेर बसेका छौँ । यो प्रकारको कहालीलाग्दो अवस्था छ,” उनले भने, “प्रधानमन्त्रीले भारत भ्रमणका क्रममा १० हजार मेगावाट बिजुली भारतले खरिद गर्ने कुरा चर्चामा आएको त छ, तर के जुनसुकै देशको ठेकेदार र कम्पनीबाट उत्पादित बिजुली निर्वाध ढंगले पठाउने सन्दर्भमा के त्यहाँ कुनै सहमति भएको छ ? १० हजार मेगावाट बिजुली निर्यात गर्नका लागि आवश्यक पर्ने संरचना निर्माणको प्रक्रियामा हामीले कहीँ गम्भीरता देखाएका छौँ ? कुनै पहलकदमी गरेका छौँ ? छैनौँ । हमीले नारा दिएका मात्रै छौँ ।”

आन्तरिक खपत बढाउनुको साटो विद्युत् खेर जाने भयो भन्दै उत्पादन बन्द गर्न नहुनेमा उनले जोड दिए ।