काठमाडौं । कप्तान क्राइग एर्भिन र सिन विलियम्सको शतकप्रेरित जिम्बाब्वेले आईसीसी विश्वकप छनोटको पहिलो खेलमा नेपालविरुद्ध आठ विकेटको सहज जित निकालेको छ । 

आइतबार जिम्बाब्वेको राजधानी हरारेस्थित हरारे स्पोर्ट्स क्लबमा दुई ब्याटरले शतक बनाउँदा जिम्बाब्वेले नेपालले प्रस्तुत गरेको २९१ रनको लक्ष्य ४४.१ ओभरमा दुई विकेट गुमाएर पूरा गर्‍यो ।

जिम्बाब्वेका जितमा उत्कृष्ट ब्याटिङ गरेका कप्तान एर्भिनले अविजित १२१ रन बनाए । नेपाली बलरलाई दबाबमा राखेका ओपनर एर्भिनले १२८ बलमा १५ चौका र एक छक्का प्रहार गरे ।

एर्भिनसँगै शतक बनाएका सिन विलियम्सले अविजित १०२ रन बनाए । ७० बलमा शतक पूरा गरेका विलियम्स जिम्बाब्वेका लागि एकदिवसीय क्रिकेटमा सबैभन्दा छिटो शतक बनाउने खेलाडी बने । आक्रामक रूपमा प्रस्तुत भएका विलियम्सले ७० बलमा १३ चौका र एक छक्का प्रहार गरे ।

यी दुईले तेस्रो विकेटका लागि अविजित १६४ रनको साझेदारी गर्दै जिम्बाब्वेलाई जितसम्म डोहोर्‍याएका थिए । यसबाहेक वेस्ली मधेभेरेले ३२ र ओपनर जोयलर्ड गम्बीले २५ रन थपे ।

जिम्बाब्वेविरुद्ध नेपालको कुनै पनि बलरले दबाब बनाउन सकेनन् । नेपालका सोमपाल कामी र गुल्सन झाले समान एक विकेट लिए । 

त्यसअघि आसिफ र कुशलले कीर्तिमानी साझेदारी गरेपछि टस हारेर ब्याटिङमा आएको नेपालले निर्धारित ५० ओभरमा आठ विकेट गुमाएर २९० रनको योगफल खडा गरेको थियो । 

नेपालका ओपनिङ जोडी आसिफ र भुर्तेलले जिम्बाब्वेविरुद्ध १७१ रनको सानदार साझेदारी गरेका थिए । एकदिवसीय अन्तर्राष्ट्रिय क्रिकेटमा नेपालको यो अहिलेसम्मकै उच्च साझेदारी हो ।

यसअघि २०२३ को फेब्रुअरीमा ज्ञानेन्द्र मल्ल र आसिफ शेखले नामिबियाविरुद्ध १३९ रनको साझेदारी गर्नु नै एकदिवसीय अन्तर्राष्ट्रिय क्रिकेटमा अहिलेसम्मको उच्च साझेदारी थियो ।

शतक बनाउनबाट एक रनले चुकेका भुर्तेल ९९ रनमा आउट भए । उनी नेपालबाट एकदिवसीय अन्तर्राष्ट्रिय क्रिकेटमा टेस्ट राष्ट्रविरुद्ध अर्धशतक बनाउने पहिलो ब्याटरसमेत बने । उनले ९५ बलमा १३ चौका र दुई छक्का प्रहार गरे । 

कुशल चौथो ओभरमा एक रनमा खेलिरहँदा क्याच आउट हुनबाट बचेका थिए । रिचार्ड एन्गाराभाले गरेको बलको चौथो ओभरको चौथो बलमा सिकन्दर राजाले कुशलको क्याच छुटाएका थिए । 

कुशललाई पहिलो विकेटका लागि साथ दिएका अर्का ओपनर आसिफले ६६ रन बनाए । आसिफले १०० बलमा सात चौका प्रहार गरे ।

नेपालले ३१.५ ओभरमा पहिलो विकेटको रूपमा भुर्तेललाई गुमाएको थियो । भुर्तेल ९९ रनमा रहँदा वेलिङ्टन मसाकाड्जाबाट बोल्ड भए । लगत्तै नेपालले ३३.५ ओभरमा अर्का ओपनर आसिफलाई गुमाएको थियो । आसिफ मसाकाड्जाकै बलमा र्‍यान बलबाट क्याच भए । 

यसबाहेक नेपाली टिमको खातामा कुशल भुर्तेलले ४१ रन थपे । कुशलले ४२ बलमा दुई चौका र तीन छक्का प्रहार गरे । कप्तान रोहितकुमार पौडेलले २९ बलमा पाँच चौकासहित ३१ रन थपे । आरिफ शेखले ११ बलमा १० रन थपे । गुल्सन झाले १३ रन थप्दा दीपेन्द्रसिंह ऐरी ६ रनमा र भीम सार्की ‘गोल्डेन डक’ भए । करण केसी दुई रनमा र सोमपाल कामी शून्यमा अविजित रहे ।

नेपालले ४२औँ ओभरको चौथो बलमा पेनाल्टीबापत पाँच रन पाएको थियो । जिम्बाब्वेका विकेटकिपरले फिल्डिरले दिएको बल समाउँदा एक हातको ग्लोभ्स खोलेका थिए । तर, बल समाउदा खोलेको ग्लोभ्समा लागेपछि नेपालले पाँच रन पेनाल्टीबापत पाएको थियो ।

जिम्बाब्वेका रिचार्ड एन्गाराभाले चार विकेट लिए । नौ ओभर बलिङ गरेका एन्गाराभाले एक मेडन राख्दै ४३ रन खर्चिए । वेलिङ्टन मसाकाड्जाले दुई र टेन्डाई चतरा रसमान एक विकेट लिए ।

छनोटमा नेपाल र जिम्बाब्वे समूह ‘ए’ मा छन् । यस समूहमा यी दुई टिमसँगै नेदरल्यान्ड्स, अमेरिका र वेस्टइन्डिज छन् ।

नेपाल र जिम्बाब्वेबीचको एकदिवसीय अन्तर्राष्ट्रिय क्रिकेटको यो पहिलो खेल हो । नेपालले पहिलोपटक टेस्ट मान्यता प्राप्त राष्ट्रविरुद्ध एकदिवसीय अन्तर्राष्ट्रिय क्रिकेट खेलेको हो ।