ताप्लेजुङ । ताप्लेजुङमा शनिबार राति खसेको पहिरोमा पुरिएर बेपत्ता भएकाहरूको खोजी तीव्र पारिएको छ । प्रहरीका अनुसार आज बिहान सबेरैदेखि बेपत्ता भएहरूको खोजी तीव्र पारिएको हो ।

निरन्तरको वर्षासँगै गए राति गएको पहिरोले पुरिएर जिल्लाको सिदिङ्वा गाउँपालिका–६, मेहेले भालुखोपका एकै परिवारका तीनसहित चारजना बेपत्ता भएका छन् । मेहेलेका स्थानीय यादव बुढाथोकीकी श्रीमती भगीमाया, बुहारी सन्ध्या र नाति प्रज्जवल बेपत्ता भएका हुन् ।

यस्तै, सोही स्थानका गणेश तामाङ पनि पहिरोमा परेर बेपत्ता छन् । बेपत्ता हुनेको अहिले खोजी सुरु गरिएको ताप्लेजुङका प्रहरी प्रमुख प्रहरी नायब उपरीक्षक राजन लिम्बूले जानकारी दिए । उनका अनुसार बेपत्ताको खोजीमा इलाका प्रहरी कार्यालय तेल्लोकबाट प्रहरी टोली खटिएको छ ।

यता, वर्षाको क्रम निरन्तर रहेकाले पहिरोले पुरिएर बेपत्ता हुनेको खोजी तथा अन्य जोखिममा परेकाको उद्धारको कार्यमा कठिनाइ भएको प्रमुख जिल्ला अधिकारी गोमादेवी चेम्जोङले बताइन् ।

मौसम प्रतिकूल भए पनि बेपत्ता हुनेको खोजी र जोखिममा परेका परिवारको उद्धारमा सम्बन्धित स्थानीय तह तथा जनप्रतिनिधिसँग समन्वय गरेर सुरक्षाकर्मी खटिइसकेको प्रजिअ चेम्जोङले जानकारी दिइन् ।

यसैगरी, चार दिनदेखिको निरन्तरको वर्षाका कारण जिल्लाका विभिन्न ठाउँमा बाढी–पहिरोले मानव बस्ती जोखिममा परेको छ । ठाउँठाउँमा भौतिक संरचनामा क्षति पुगेको छ ।

स्थानीयका अनुसार सिदिङ्वा गाउँपालिका–३, आङ्खोपका प्रेमकुमार सेलिङसहितका तीन घर पहिरोले बगाएको छ । त्यस्तै, अरू तीन घर उच्च जोखिममा परेको शिक्षक समेत रहेका स्थानीय चैतन्यप्रसाद बुडाक्षेत्रीले जानकारी दिए ।

यस्तै, सिरिजंघा गाउँपालिका–८, याम्फुदिनमा स्थानीय जगतबहादुर राईको होटेल (कटेज) काबेली खोलामा आएको बाढीमा परेको छ । स्थानीय मनकुमार राईका अनुसार हाल याम्फुदिनका करिब १५ परिवार बाढी–पहिरोको उच्च जोखिमका कारण विस्थापित भई सुरक्षित स्थानमा रहँदै आएका छन् ।

त्यस्तै, तमोर नदी र मैवाखोलामा आएको बाढीले मेरिङ्देन गाउँपालिका–३, खाम्लुङको दोभान बजार पनि जोखिममा परेको स्थानीयले बताएका छन् । दोभान बजारका स्थानीय टंकप्रसाद खतिवडाका अनुसार तीन घर उच्च जोखिममा परेको छ ।

मैवाखोला गाउँपालिका–६, फाकुम्बामा पनि केही घर पहिरोको जोखिममा परेका स्थानीयले बताएका छन् । ताप्लेजुङको सदरमुकामसहित धेरै क्षेत्रमा विद्युत् समेत अवरुद्ध भएको छ ।

जिल्लाका विभिन्न क्षेत्रमा स्वास्थ्यचौकी भवन, विद्यालय, सडक, मोटरेबल पुल, झोलुंगे पुललगायत भौतिक संरचनामा समेत बाढी–पहिरोले क्षति गरेको प्रहरीले जानकारी दिएको छ ।

वर्षाका कारण गएको शुक्रबारदेखि जिल्लामा बाढी–पहिरोको घटना भएको हो । अहिले वर्षा निरन्तर भइरहेकाले जिल्लाका सबैतिरको क्षतिको यकिन विवरण आइनसकेको प्रमुख जिल्ला अधिकारी चेम्जोङले बताइन् ।

उनले स्थानीय तह समेतको समन्वयमा प्रहरीले क्षतिको विवरण संकलन गरिरहेको पनि जानकारी दिए ।

प्रजिअ चेम्जोङले वर्षाको क्रम निरन्तर रहेकाले बाढी–पहिरोबाट हुने क्षति तथा सम्भावित जोखिमप्रति सचेत रहन जिल्लावासीलाई आग्रह गरेकी छन् । रासस