काठमाडौं । नेपालमा यो वर्षको मनसुन प्रणाली बुधबार (आज)देखि भित्रिएको छ । कोसी प्रदेश, मधेस प्रदेश, वाग्मती प्रदेशका अधिकांश भू–भाग र गण्डकी प्रदेशका पूर्वी भू–भागमा मनसुन प्रणाली आगमन भएको मौसम पूर्वानुमान महाशाखाले जनाएको छ ।

• नेपाल भित्रियो मनसुन प्रणाली

नेपालमा हरेक वर्ष मनसुन भित्रिने सरदर मिति जुन १३ तारिख हो । यो वर्षको मनसुन सरदर मितिभन्दा एक दिन ढिलो नेपाल प्रवेश गरेको छ । नेपालका अरू भू–भागमा केही दिनमा क्रमिक रूपमा मनसुन अगाडि बढ्ने महाशाखाले जनाएको छ ।

नेपालबाट सरदर अक्टोबर २ मा मनसुन बाहिरिने गर्छ । यो पनि औसत मिति मात्र हो । महाशाखाका अनुसार योभन्दा केही दिनअगाडि वा पछाडि मनसुन बाहिरिने गर्छ ।

• मनसुन के हो ? कहाँ, कसरी बनेर आउँछ नेपालमा ?

गत वर्ष अर्थात् सन् २०२२ मा नेपालमा सरदर मितिभन्दा आठ दिनअघि जुन ५ मै मनसुन भित्रिएको थियो । गत वर्ष सरदर मितिभन्दा १४ दिन ढिलो अर्थात् अक्टोबर १६ मा नेपालबाट मनसुन बाहिरिएको महाशाखाकी मौसमविद् विनु महर्जनले जानकारी दिइन् ।

यस्तै, २०२१ मा सरदर मितिभन्दा दुई दिनअघि अर्थात् जुन ११ मा मनसुन भित्रिएको थियो । त्यति बेला अक्टोबर ११ मा नेपालबाट मनसुन बाहिरिएको थियो ।

मौसमविद् महर्जनका अनुसार सन् १९६८ यता नेपालमा मनसुन भित्रिएको र बाहिरिएको तथ्यांक राखिएको छ । १९६८ मा जुन १७ मा मनसुन भित्रिएको थियो । त्यति बेला सेप्टेम्बर २१ मा नेपालबाट मनसुन बाहिरिएको थियो ।

नेपालमा हरेक वर्ष पूर्वी भेग हुँदै मनसुन भित्रिने गर्छ । क्रमशः देशभरि हुँदै फेरि फर्किएर पूर्वी भेगबाटै मनसुन बाहिरिने उनले जानकारी दिइन् ।

मौसमविद्ले योपटक मनसुनमा सरदरभन्दा कम वर्षा हुने अनुमान गरेका छन् । मौसमविद्का अनुसार मनसुनको खास प्रकृति लामो समय पानी (झरी) पर्ने हो । तर, पछिल्ला वर्ष यसमा केही फरक देखिएको उनले बताइन् ।

नेपालमा मनसुन भित्रिएको र बाहिरिएको तथ्यांक हेर्नोस्–