काठमाडौं । अर्थमन्त्री डा. प्रकाशशरण महतले कसरी, कुन ‘मोडेल’मा गाँजाखेती सकिन्छ भनेर अध्ययन गर्न बजेट विनियोजन गरिएको बताएका छन् । प्रतिनिधिसभा बैठकमा सोमबार बजेटमाथिका प्रश्नहरूको जवाफ दिने क्रममा उनले यस्तो बताएका हुन् ।

“गाँजाखेतीलाई कसरी कार्यान्वयन गर्न सकिन्छ, यो विषयमा गम्भीर होऔँ भनेर अध्ययन गरौँ भनेको हो । एकैपटक खेती गरिहाल्ने, भोलिदेखि नै सुरु गर्ने भनेको छैन,” उनले भने, “यसको कानुनी अड्चनहरू पनि हटाउनुप¥यो । त्यसपछि कुन मोडेलमा अगाडि लग्ने भन्ने पनि छ । अहिले त औषधिजन्य प्रयोजनको लागि मात्र अध्ययन गर्ने भनेको हौँ ।”

अरू देशहरूले यसको फाइदा उठाउँदा यहाँ पुरानै मानसिकता लिएर बस्न नहुनेमा उनले जोड दिए । पहिले गाँजाखेती बन्द गरेका अरू देशहरूले अहिले ‘बिग बिजनेस’ गरिरहेको उनको भनाइ छ । 

“गाँजाखेतीको बारेमा पनि चर्चा भयो । केको लागि ल्याएको हो भनेर पूर्वप्रधानमन्त्रीले समते प्रश्न उठाउनुभयो । जुन देशहरूले हिजो हामीलाई भने– यो रोक होइन भने सहयोग नै बन्द हुन्छ । त्यस हिसाबले हामीले रोक्यौँ,” उनले भने, “तर, उनीहरूले नै अहिले औषधि प्रयोजनको लागि खुला गर्ने भनेर बिग बिजनेस गरिरहेका छन् । उनीहरूले यसको फाइदा उठाइरहने हामी पुरानै मानसिकता नबस्ने हो कि !”