काठमाडौं । अमेरिकी अर्बपति ‘हेज फन्ड म्यानेजर’ जर्ज सोरोसले आफ्नो अर्बाैँ डलरको सम्पत्ति छोरालाई हस्तान्तरण गर्ने निर्णय गरेका छन् ।

९२ वर्षीय जर्ज सोरोसले ३७ वर्षीय छोरा अलेक्ज्यान्डरलाई २५ अर्ब अमेरिकी डलरको वित्तीय ‘साम्राज्य’ हस्तान्तरण गर्न लागेका हुन् ।

यसअघि, सोरोसले आफ्नो ओपन सोसाइटी फाउन्डेसन (ओएसएफ) आफ्ना पाँच सन्तानमध्ये कसैलाई दिन नचाहेको बताएका थिए । तर, अहिले उनले आफ्नो मनसाय बदलेको र छोरा अलेक्ज्यान्डर यो पाउने बताएका हुन् ।

ओएसएफ १२० भन्दा बढी देशमा सक्रिय छ । यसले नागरिक समाजलाई सुदृढ गर्न, मानवअधिकारको विकास र भ्रष्टाचारविरुद्ध लड्न वार्षिक रूपमा १.५ अर्ब अमेरिकी डलर खर्च गर्ने गर्छ ।

एलेक्स भनेर समेत चिनिने सोरोसका छोराले जर्नलसँगको अन्तर्वार्तामा आफूलाई बुवाभन्दा बढी राजनीतिक भनेर वर्णन गरेका छन् । उनले संयुक्त राज्य अमेरिकामा वाम झुकाव राख्ने उमेदवारहरूलाई चन्दा दिन जारी राख्ने पनि बताएका छन् ।

जर्ज सोरोस अमेरिकाको डेमोक्र्याटिक पार्टीका लागि सबैभन्दा बढी चन्दा दिने व्यक्ति पनि हुन् । एलेक्स सोरोसका पाँच सन्तानमध्ये चौथो हुन् । अलजजिराबाट ।