काठमाडौं । काठमाडौं महानगरपालिकाले वडा नम्बर २९ मा रहेको सरकारी जग्गा खाली गराएको छ ।

वडा नम्बर २९ को वडा कार्यालय बनाउने भन्दै महानगरले डोजर लगाएर सरकारी जग्गा खाली गराएको हो । महानगरको उक्त कदमप्रति भने स्थानीयले विरोध जनाएका छन् ।

सरकारी जग्गालाई अतिक्रमण हुनबाट रोकेर संरक्षण गर्दै स्थानीयले खेल्ने ठाँउ बनाएको स्थानमा महानगरले जबरजस्ती हस्तक्षेप गरेको उनीहरुको भनाइ छ । उनीहरुले सोही स्थाननजिकै रहेको अन्य दुईवटा सरकारी जग्गामा वडा कार्यालय बनाउन सुझाव दिएका छन् ।

वडा नम्बर २९ ले भने स्थानीयले खेल्ने स्थानमा नै कार्यालय बनाउने तयारी गरेको छ । सोहीअनुरुप वडा कार्यालय बनाउनका लागि सरकारी जग्गा खाली गराएको काठमाडौं महानगर प्रहरी प्रमुख राजु पाण्डेले बताए ।

उनले सार्वजनिक जग्गा केही व्यक्तिले अतिक्रमण गरेर बसेकाले नै अतिक्रमित भाग डोजर लगाएर हटाइएको बताए । वडा कार्यालय निर्माण गर्ने विषयमा यसअघि काठमाडौं क्षेत्र नम्बर १ का सांसद प्रकाशमान सिंहसहित बसेको सर्वपक्षीय छलफल पनि निष्कर्षविहीन भएको थियो ।