काठमाडौं । गत वर्ष ‘बी’ डिभिजन लिगमा च्याम्पियन बनेर शीर्ष लिगमा पाइला टेकेको चर्च ब्वाइज युनाइटेडले मंगलबार थ्री स्टारसँग गोलरहित बराबरी खेल्दै एक खेलअगावै सहिद स्मारक ‘ए’ डिभिजन लिगको उपाधि जितेको छ ।

लिगको अन्तिम खेलमा चर्च ब्वाइजले खुमलटारसँग प्रतिस्पर्धा गर्नेछ । उपाधि होडमा रहेको अर्को टिम हो, साविक विजेता मछिन्द्र । मछिन्द्रले अब मनाङ मर्स्याङ्दी र हिमालयन शेर्पाविरुद्ध खेल्न बाँकी छ ।

चर्च ब्वाइजले आजको बराबरीसँगै ४५ अंक जोडेको छ । दुई खेल खेल्न बाँकी हुँदा मछिन्द्रको ३९ अंक छ । दुई क्लबबीच ६ अंकको अन्तर छ । लिगमा ६ अंकको खेल बाँकी छ ।

त्यसकारण चर्च ब्वाइजको उपाधि पक्का भएको हो । कारण, मछिन्द्रले बाँकी दुवै खेल जित्नुका साथै चर्च ब्वाइजले अन्तिम खेल हारे पनि अंक बराबर हुनेछ ।

लिगको नियमावलीअनुसार अंक बराबर भएमा ‘हेड टु हेड’का आधरमा निर्णय हुनेछ । ‘हेड टु हेड’मा चर्च ब्वाइज अगाडि छ । चर्च ब्वाइजले पहिलो चरणमा मछिन्द्रसँग गोलरहित बराबरी खेलेको थियो । दोस्रो चरणमा २–१ ले विजय हासिल गरेको थियो । त्यसकारण, आज चर्च ब्वाइजले उपाधि पक्का गरेको हो ।

यससँगै लिगमा नयाँ विजेता थपिएको छ । साथै चर्च ब्वाइजले मनाङ मर्स्याङ्दीको कीर्तिमानसँग पनि बराबरी गरेको छ । त्यो कीर्तिमान हो, ‘सी’ डिभिजनबाट लगातार च्याम्पियन हुँदै शीर्ष डिभिजन लिगको उपाधि जित्ने ।

यसअघि मनाङले २०४३ सालमा यस्तो सफलता हासिल गरेको थियो । फरक मात्र यत्ति हो की त्यतिबेला ‘डी’ डिभिजन हुन्थ्यो भने अहिले ‘सी’ डिभिजन क्वालिफायर हुन्छ । बस्, मनाङ र चर्च ब्वाइजको सफलतामा यत्तिमात्र फरक हो । मनाङले ‘डी’ डिभिजन खेल्यो भने चर्च ब्वाइजले ‘सी’ डिभिजन क्वालिफायर ।

चर्च ब्वाइज २०७६ सालमा ‘सी’ डिभिजन लिगको हैसियत हासिल गर्नु अघि पाँच पटक छनोट प्रतियोगितामा असफल भएको थियो । २०६६ सालमा स्थापना भएको चर्च ब्वाइज जब ‘सी’ डिभिजन लिगमा बढुवा भयो, त्यसपछि भने क्लबले पछाडि फर्केर हेर्नु परेको छैन । तेस्रो डिभिजनमा बढुवा भएकै वर्ष ‘सी’ च्याम्पियन बन्दै चर्च ब्वाइज ०७७ सालमा ‘बी’ डिभिजन लिगमा उक्लिएको थियो ।

त्यहीँ च्याम्पियन लय कायम राख्दै चर्च ब्वाइजले सहिद स्मारक ‘बी’ डिभिजन लिगमा एक खेल अगावै उपाधि पक्का गरेर शीर्ष डिभिजनको लिगमा बढुवा भएको थियो । आज पनि चर्च ब्वाइजले एक खेल अगाडि शीर्ष डिभिजन लिगको उपाधि जितेको छ ।

‘ए’ डिभिजन लिगको उपाधि मनाङले सबैभन्दा धेरै आठ पटक जितेको छ । रानीपोखरी कर्नर टिम (आरसीटी)ले ६ पटक उपाधि जितेको छ । नेपाल पुलिस क्लबले पाँच पटक उपाधि जितेको छ । विभागीय टिम पुलिसले पहिले पुलिस फोर्सको नाममा लिग खेल्थ्यो। तर अहिले नेपाल पुलिसको नाममा खेल्छ । बीचमा एकपटक महेन्द्र पुलिस क्लबको नामबाट पनि खेल्यो ।

चार पकट उपाधि जित्नेमा एनआरटी छ । तीनपटक उपाधि जित्ने तीन क्लब छन् । ती हुन्, थ्रीस्टार, संकटा र महाबीर–११ । देउराली क्लब, अन्नपूर्ण क्लब र मछिन्द्रले समान दुई पटक लिग जितेका छन् । सुनाखरी एथ्लेटिक्स, ब्वाइज युनियन, फ्रेण्ड्स युनियन, विद्या ब्यायाम र सैनिक–११ ले एक एक पटक उपाधि जितेका छन् ।

यता बराबरीसँग थ्री स्टारको रेलिगेशनमा पर्ने सम्भावना भने कायमै रहेको छ । अन्तिम खेलअघि थ्री स्टारको २९ अंक छ ।