काठमाडौं । प्रमुख प्रतिपक्षी दल नेकपा (एमाले)ले बजेट बनाउँदा अर्थमन्त्री प्रकाशशरण महतले अनधिकृत व्यक्तिलाई प्रवेश गराएर करको दर परिवर्तन गरेको भन्दै संसद् सञ्चालनमा अवरोध गरेको छ ।

सञ्चारमाध्यममा सोसम्बन्धी समाचार प्रकाशन प्रसारण भएपश्चात् एमालेले त्यसको विरोध गरेको हो ।

पार्टी प्रमुख सचेतक पदम गिरीले बजेट बनाउँदा अर्थमन्त्री प्रकाशशरण महतले करका दर हेरफेरमा अनधिकृत व्यक्तिलाई प्रवेश गराएको विषय सञ्चार माध्यममा आएको भन्दै त्यसको सत्यतथ्यको माग एमालेले गरेको उनले जानकारी दिए ।

गिरीका अनुसार सत्यता जाँच गर्न एमालले संसदीय छानबिन समिति गठन हुनुपर्ने र यथार्थ सार्वजनिक गरिनुपर्ने माग एमालेको छ ।

“सञ्चारमाध्यममा आएको कुराको सत्यता छानबिन गर्न छानबिन समिति गठन हुनुपर्छ । समिति गठन नभएसम्म संसद् चल्न सक्दैन,” उनले भने, “हामी छलफलमा छौँ । सहमति भएको छैन ।”

एमालेले छानबिन समिति गठन नभएसम्म संसद् चल्न नदिने बताएको छ ।