काठमाडौं । प्रधानमन्त्री पुष्पकमल दाहाल ‘प्रचण्ड’ले आफ्नो भारत भ्रमण द्विपक्षीय सम्बन्धलाई बलियो बनाउनेमा केन्द्रित रहेको बताएका छन् ।
भारत भ्रमणबारे प्रतिपक्ष दलले प्रश्न उठाएपछि सोमबार प्रतिनिधिसभा बैठकमा जवाफ दिँदै उनले आपसी विश्वास बढाउँदै छलफल गरिएको सुनाए ।
“भ्रमण आगामी दिनमा द्विपक्षीय सम्बन्धलाई बलियो बनाउनेमा केन्द्रित रह्यो । विशेष गरी आर्थिक मामिलामा राष्ट्रको दीर्घकालीन हितमा सम्झौताहरू भएका छन् भने राजनीतिक मामिलामा आपसी विश्वास बढाउँदै छलफल र वार्ताद्वारा निकास खोज्ने दिशामा अर्थपूर्ण प्रतिबद्धता व्यक्त भएका छन्,” प्रधानमन्त्री प्रचण्डले भने ।
उनले भारतका प्रधानमन्त्री नरेन्द्र मोदीसँगको भेटघाट सबैभन्दा महत्त्वपूर्ण भएको सुनाए । नयाँ दिल्लीस्थित हैदराबाद हाउसमा भएको भेटवार्तामा व्यापार, ऊर्जा, लगानी प्रवद्र्धन, ऊर्जा व्यापार तथा अन्तरदेशीय प्रसारणलाइन, सिँचाइ, बाढी, कृषि, रेलवे सेवाजस्ता विषयमा सकारात्मक र अर्थपूर्ण छलफल भएको उनको भनाइ छ ।
