काठमाडौं । नेकपा (एमाले)ले नागरिकता विधेयक प्रमाणीकरणको सिफारिस गर्ने अधिकार प्रधानमन्त्रीलाई नभएको जिकिर गरेको छ । सोमबार प्रतिनिधिसभा बैठकमा एमालेका सांसद योगेश भट्टराईले प्रधानमन्त्रीले नभएको अधिकारबाट राष्ट्रपतिलाई उक्साएको आरोप लगाए ।

“प्रधानमन्त्रीलाई हुँदै नभएको अधिकार । विधेयक प्रमाणीकरण गर्न सिफारिस गर्ने अधिकार उहाँलाई कसले दियो ? त्यो अधिकार प्रयोग गरेर राष्ट्रपतिलाई गैरसंवैधानिक काम गरेर उक्साउने, संविधान मिच्न दुरुत्सहान गर्ने,” भट्टराईले भने ।

उनले संसद्को विशेष अधिकार हनन भए कारबाही हुन सक्ने नियमावलीमा व्यवस्था रहेको बताए ।

भट्टराईले राष्ट्रपति संसद्कै अंग भएको बताउँदै संसद् सचिवालयमा आएको पत्रमा कुन सभामुखको नाम छ भन्दै प्रश्न गरे ।

“संसद्लाई दिउँसै ढाँट्ने ? जनतालाई ढाँट्ने ? राष्ट्रपति संसद्को एउटा अंगो हो,” उनले भने ।

उनले सर्वोच्च अदालतलाई धन्यावाद पनि दिए । उनले ‘मृत भइसकेको विधेयक ब्युँताउने तागत प्रधानमन्त्रीलाई भए द्वन्द्वकालमा मृत भएका १७ हजारलाई उठाइदिऊँ’ भन्दै कटाक्ष गरे ।