काठमाडौं । पाकिस्तान क्रिकेट बोर्ड (पीसीबी)ले अन्तर्राष्ट्रिय क्रिकेट परिषद् (आईसीसी)का अध्यक्ष ग्रेज बार्कले र प्रमुख कार्यकारी जिओफ अलार्डिससामु सन् २०२५ मा हुने च्याम्पियन्स ट्रफीमा भारतको सहभागिता सुनिश्चित गर्न माग गरेको छ ।

पीसीबीका अधिकारीले बुधबार आईसीसी नेतृत्वसँग दुई वर्षपछि पाकिस्तानमा हुने एकदिवसीय ढाँचाको च्याम्पियन्स ट्रफीमा भारतको सहभागिता सुनिश्चित भए मात्र आफ्नो टिमले एकदिवसीय विश्वकपका लागि भारत भ्रमण गर्ने बताएका हुन् ।

पीसीबीका अन्तरिम व्यवस्थापनक कमिटीका अध्यक्ष नजाम सेठीले हालै पाकिस्तानले विश्वकप बहिष्कार गर्ने ‘धेरै सम्भावना’ रहेको चेतावनी दिएका थिए । यसै वर्षको सेप्टेम्बरमा पाकिस्तानमा हुने एसिया कपका लागि भारतीय क्रिकेट बोर्ड (बीसीसीआई)ले टिम पठाउन अस्वीकार गरेपछि सेठीले भारतमा हुने विश्वकपमा पनि पाकिस्तानी टिम सहभागी नहुने चेतावनी दिएका हुन् ।

बीसीसी पाकिस्तानले प्रस्ताव गरेको ‘हाइब्रिड मोडेल’मा पनि सहमत छैन । पीसीबीले प्रस्ताव गरेको यो मोडेलअनुसार एसिया कपमा भारतका बाहेक समूह चरणका चार खेल पाकिस्तानमा हुनेछन् । त्यसबाहेक प्रतियोगिता तटस्थ भूमिमा सञ्चालन गरिनेछ । यो प्रस्ताव भारतले स्वीकार गरे पनि पाकिस्तानले विश्वकपमा आफ्नो खेलहरू भारतबाहिर खेल्ने र च्याम्पियन्स ट्रफीमा पनि भारतलाई यही विकल्प दिनेछ ।

पीसीबी अधिकारीसँगको छलफलमा आईसीसीका प्रतिनिधिले एसिया कप आफूहरूका लागि चिन्ताको विषय नभएको भन्दै विश्वकपको विषय समाधान गर्नुपर्ने धारणा राखेका थिए ।

अध्यक्ष सेठी र अरू अधिकारीले आईसीसीका अधिकारीसँग च्याम्पियन्स ट्रफीमा भारतको सहभागिता निश्चित गर्न आधिकारिक आश्वासन माग गरेका हुन् । पाकिस्तानले आईसीसीबाट दुई वर्षअघि च्याम्पियन्स ट्रफी आयोजनाको अधिकार पाएको थियो । एजेन्सीको सहयोगमा