काठमाडौं । आन्तरिक राजस्व विभागले धितोपत्रको पटके कारोबार गर्नेलाई पाँच प्रतिशत र ७.५ प्रतिशत नै कर लाग्ने बताएको छ ।

आर्थिक विधेयक, २०८० को दफा २९ बमोजिम धितोपत्रको नियमित व्यवसायिक कारोबार गर्ने प्राकृतिक व्यक्तिलाई प्रदान गरिएको छुट सुविधाका बारेमा द्विविधा आएको भन्दै सूचना जारी गर्दै स्पष्टीकरण दिएको छ ।

नियमित व्यवसायको रूपमा नभई पटके रूपमा लगानी गरेको धितोपत्र बिक्रि गर्दा हुने लाभमा साविकबमोजिमकै कानुनी व्यवस्था कायम रहेको सूचनामा उल्लेख छ ।

“पटके सेयर कारोबार गर्नेलाई पाँच प्रतिशत र ७.५ प्रतिशत नै कर लाग्ने हो, करको दर हेरफेर गरिएको छैन,” सूचनामा स्पष्ट पारिएको छ । नियमित सेयर कारोबार गर्नेको हकमा मात्र अहिलेको व्यवस्था लागु हुने बताइएको छ ।

“लगानकर्ता द्विविधामा नपर्नुहोला पहिले कर जति तिर्दै आउनु भएको थियो । अहिले पनि त्यति नै तिर्ने हो । तर, सेयर बजारलाई नै व्यवसाय बनाएर लाभ लिने नियमित कारोबारीले आर्थिक विधेयक, २०८० को दफा २९ अनुसार कर तिर्नुपर्छ” विभागले स्पष्टीकरण दिएको छ ।