विराटनगर । कोसी प्रदेशको बजेट अविधेशनअन्तर्गत बुधबार दोस्रो बैठक बस्दै छ । बैठक अगावै प्रदेशसभा सचिवालय वरिपरि सुरक्षा व्यवस्था कडा पारिएको छ ।

पहिचानवादीले गर्न सक्ने विरोध प्रदर्शनलाई मध्यनजगर गरी सभाक्षेत्रमा सशस्त्र र नेपाल प्रहरीको उपस्थिति बाक्लो बनाइएको जिल्ला प्रहरी कार्यालय मोरङले जनाएको छ ।

प्रदेशसभा सचिवालयका अनुसार बैठकमा आर्थिक वर्ष २०८०/०८१ को बजेटको सिद्धान्त र प्राथमिकता प्रस्तुत पेस हुँदै छ । आर्थिक मामिला तथा योजनामन्त्रीका तर्फबाट मुख्यमन्त्री हिक्मत कार्कीले विनियोजन विधेयकमा समावेश हुने सिद्धान्त र प्राथमिकतामासम्बन्धी प्रस्ताव सदनमा पेस गर्नेछन् ।

पेस भएको प्रस्तावमा सदनमा छलफल हुनेछ । यसैगरी संविधानको धारा २०२ बमोजिम जारी अध्यादेश कोसी प्रदेशसभा नियमावली २०७४ पहिलो संशोधनको समेतको नियम ८१(४) बमोजिम स्वीकृतिका लागि प्रस्ताव पेस हुनेछ ।

प्रदेशसभा सचिव गोपाल पराजुलीका अनुसार कोसी प्रदेशसभा नियमावली मस्यौदा समितिका संयोजकले कोसी प्रदेशसभा नियमावली, २०७९ को मस्यौदा सभामा पेस गर्नेछन् ।