काठमाडौं । सरकारले राजमार्ग र रणनीतिक सडकअन्तर्गत आउँदो आर्थिक वर्षमा १५० पुलको निर्माण कार्य सम्पन्न गरिने जनाएको छ ।

आउँदो आर्थिक वर्ष २०८०/०८१ का लागि सोमबार बजेट प्रस्तुत गर्दै अर्थमन्त्री डा. प्रकाशशरण महतले पुल निर्माणका लागि दुई अर्ब आठ करोड रुपैयाँ विनियोजन गरिएको बताए ।

यस्तै, सूर्यविनायक–धुलिखेल सडकखण्डको विस्तार कार्य अघि बढाउन आवश्यक रकम समेत सरकारले विनियोजन गरेको छ ।

काठमाडौंको चक्रपथ, कलंकी र वसुन्धराखण्डको सडक विस्तार तथा निर्माण कार्यलाई तीव्रता दिन दुई अर्ब सात करोड छुट्टयाइएको छ ।

राष्ट्रिय राजमार्गमा आवश्यकतानुसार फ्लाईओभर र अन्डरपास निर्माण गरिने, ललितपुरको ग्वार्कोमा फ्लाईओभर निर्माण कार्य आउँदो आर्थिक वर्षमा सम्पन्न गरिने जनाइएको छ ।

यस्तै, कोटेश्वर, सातदोबाटो र एकान्तकुनामा फ्लाईओभर र अन्डरपास निर्माण कार्य सुरु गरिने समेत सरकारले जनाएको छ ।